सहिद स्मारक लिग ‘ए’ डिभिजन लिग फुटबलको चौथो चरण जारी रहँदा दोस्रो दिन दुई खेल हुनेछन् । त्रिपुरेश्वरस्थित दशरथ रङ्गशालामा दिउँसो १ बजे र साँझ पौने ५ बजे खेल हुनेछन् । शनिबारको पहिलो खेलमा नवप्रवेशी सात दोबाटो युथ क्लब र न्युरोड टिम एनआरटीबीच भिडन्त हुनेछ । सात दोबाटो प्रतियोगितामा लगातार तेस्रो जित निकाल्ने दाउमा हुनेछ ।

यदि ह्याट्रिक जित निस्किए सात दोबाटो पुनः एक पटक शीर्ष स्थानमा उक्लनेछ । सात दोबाटो ३ खेलमा ७ अङ्क जोडेर तेस्रो स्थानमा छ । खराब प्रदर्शनमा रहेको एनआरटी भने पहिलो जितको खोजीमा छ । विदेशीसहित केहीस्तरीय राष्ट्रिय खेलाडी सम्मिलित एनआरटीले सोच अनुरुप लिगमा प्रदर्शन दिन सकेको छैन । एनआरटी ३ खेलबाट २ अङ्क जोडेर ११ औँ स्थानमा छ ।

दिनको दोस्रो खेलमा साविक विजेता मछिन्द्र फुटबल क्लबले हिमालयन शेर्पा क्लबसँग प्रतिस्पर्धा गर्नेछ । उपाधि जोगाउने योजना बनाएको मछिन्द्र सिष्टममा फुटबल खेल्दै गरेका शेर्पालाई पराजित गर्दै आफ्नो यात्रलाई अगाडि बढाउने प्रयासमा हुनेछ ।

अधिकांश राष्ट्रिय टोलीका खेलाडी रहेको मछिन्द्र खेलमा पकड जमाउँदै शेर्पाबाट तीन अङ्क जोड्न दाउमा छ । ७ अङ्क जोडेको मछिन्द्र चौंथो स्थानमा छ । ​शेर्पासमेत मछिन्द्रविरुद्ध अप्रत्यासित नतिजाको दाउँमा छ । युवा र विदेशी खेलाडी मिश्रित शेर्पा पहिलो जित निकाल्ने योजनामा छ । शेर्पा ३ खेलमा २ अङ्क जोडेर १० औँ स्थानमा छ । जारी लिगमा १० जित निकालेको मनाङ मर्स्याङ्दी क्लब शीर्ष स्थानमा रहेको छ ।