बीबीसी । हङकङ प्रहरीले एउटा स्वतन्त्र समाचार वेबसाइटका ६ जनालाई पक्राउ गरेको छ । ‘देशद्रोही प्रकाशनहरू प्रकाशित गर्ने षड्यन्त्र’ गरेको आरोपमा उनीहरूलाई पक्राउ गरिएको हो । स्ट्यान्ड न्युजका वर्तमान र पूर्वकर्मचारीहरू दुवै निसानामा थिए ।

स्ट्यान्ड न्युजको कार्यालयमा छापा मार्न २०० भन्दा बढी प्रहरी अधिकारीहरू परिचालन गरिएको थियो । खोजीकार्य अझै जारी छ ।
‘पत्रकारिताका सामग्रीहरू खोज्न र जफत गर्न’ आफूहरूलाई अधिकार दिइएको एक विज्ञप्तिमा प्रहरीले जनाएको छ ।

स्ट्यान्ड न्युजका वर्तमान र पूर्वप्रधानसम्पादक पक्राउ परेका छन् । साथै, पूर्वबोर्ड सदस्य रहेका प्रजातन्त्रको आइकन बनेका पपस्टार डेनिस हो पनि पक्राउ परेका छन् ।

उनले सोही आरोपमा आफूलाई पक्राउ गरी वेस्टर्न डिस्ट्रिक्ट पुलिस स्टेसनमा लगिएको फेसबुक पोस्टमा पुष्टि गरेकी छन् ।पक्राउ पर्नेमा ३४ र ७३ वर्षबीचका तीन पुरुष र तीन महिला छन् । स्ट्यान्ड न्युजको फेसबुक पेजमा पोस्ट गरिएको फुटेजमा बुधबार बिहान सबेरै डेपुटी असाइनमेन्ट डाइरेक्टर रोन्सन चानको ढोकामा धेरै प्रहरी अधिकारीहरू देखिएको छ । चान पक्राउ परेनन्, तर उनलाई प्रहरीले सोधपुछका लागि लगेको थियो ।

यस वर्षको सुरुमा सयौँ प्रहरीले अहिले बन्द भएको हङकङ र चिनियाँ नेतृत्वको मुखर आलोचकका रूपमा चिनिने एप्पल डेलीको परिसरमा छापा मारेका थिए । यसको सम्पत्ति रोक्का गरिएको थियो, कार्यकारीहरूलाई हिरासतमा राखिएको थियो । र, त्यो पत्रिका चाँडै बन्द भयो ।एप्पल डेली बन्द भएपछि त्यहाँ स्ट्यान्ड न्युज नै खुला रूपमा प्रजातन्त्रलाई समर्थन गर्ने समाचार संस्थाको रूपमा रहेको थियो ।

हङकङ जर्नलिस्ट एसोसिएसनले बुधबारको घटनाप्रति गम्भीर चासो व्यक्त गर्दै ‘द बेसिक ल’ अनुसार प्रेस स्वतन्त्रताको रक्षा गर्न सरकारसँग आग्रह गरेको छ । ब्रिटेनले चीनलाई हङकङ फिर्ता गर्ने बेलामा कार्यान्वयनमा आएको ‘द बेसिक ल’ले सभा–सम्मेलन गर्न पाउने स्वतन्त्रता, वाक् स्वतन्त्रतालगायत अधिकारको संरक्षण गर्छ ।

हङकङका अधिकारीहरूले राष्ट्रिय सुरक्षा कानुन लागु गरेपछि भिन्न मत हुनेविरुद्ध कडा कारबाही गरिरहेका छन् । सो विवादास्पद कानुनले राष्ट्रत्याग, विद्रोह र विदेशी सेनासँगको मिलेमोतोलाई अपराधको रूपमा लिन्छ र अधिकतम आजीवन कारावासको सजाय दिन्छ ।
यो कानुनले हङकङको न्यायिक स्वायत्ततालाई प्रभावकारी रूपमा घटाएको र प्रदर्शनकारी र अभियन्ताहरूलाई सजाय दिन सजिलो बनाएको आलोचकहरू बताउँछन् ।