सार्वजनिक ठाउँमा खोप कार्ड अनिवार्य गर्ने तयारीपछि खोप केन्द्रमा भिड बढ्न थालेको छ ।

कोभिड–१९ सङ्कट व्यवस्थापन समन्वय केन्द्र (सीसीएमसीसी) को हिजो आइतवार बसेको बैठकले आउँदो माघ ३ गतेदेखि सार्वजनिक ठाउँहरू– सरकारी कार्यालय, होटल, रेस्टुरेन्ट, सिनेमा हल, रङ्गशाला, हवाईयात्रा, पार्क आदिमा प्रवेश गर्दा अनिवार्य रूपमा खोप लगाएको कार्ड देखाउनुपर्ने सरकारलाई सिफारिस गरेपछि खोप लगाउनेको भिड बढेको हो ।

सीसीएमसीसीले गृह मन्त्रालयलाई खोप कार्ड देखाउनुपर्ने व्यवस्था गर्न सिफारिस गरेको छ । आज सोमवार बिहानैदेखि काठमाण्डौ उपत्यकाका विभिन्न खोप केन्द्रमा खोप लगाउनेको भिड देखिएको छ ।

काठमाण्डौको शुक्रराज ट्रपिकल तथा सरुवा रोग अस्पताल टेकु, सिभिल अस्पताल बानेश्वर लगायतका ठाउँमा मानिसको भिड बढेको हो । खोप लगाउन तीन घण्टासम्म लाइन बस्नुपरेको उनीहरूले बताएका छन् । सरकारले कोभिशिल्ड, भेरोसेल र जोनसन एन्ड जोनसन खोप दिँदै आएको छ ।

यसैबीच हिजोदेखि नै काठमाण्डौ उपत्यकाका तीन वटा जिल्ला र काभ्रेमा १२ देखि १७ वर्ष उमेर समूहका बालबालिकालाई कोरोनाविरुद्धको खोप लगाउन थाले पनि केही पालिकामा भोलि मङ्गलवारदेखि मात्रै खोप लगाउन सुरु हुने भएको छ ।

काठमाण्डौ, ललितपुर, भक्तपुर र काभ्रेमा बालबालिकालाई हिजोदेखि खोप लगाउन थालिएको छ । तर कतिपय ठाउँमा खोप लगाउन सुरु गरिएको छैन ।

१२ देखि १७ वर्ष उमेरका बालबालिकालाई फाइजर र मोडर्ना खोप लगाइने स्वास्थ्य सेवा विभागका खोप शाखा प्रमुख डा. सागर दाहालले जानकारी दिए ।