लसएन्जेल्स । अमेरिकाको क्यालिफोर्निया राज्यको साक्रामेन्टो सहरको मध्य भागमा भएको गोलीकान्डमा कम्तीमा ६ जनाको ज्यान गएको छ । अन्य १० जना घाइते भएको प्रहरीले जनाएको छ ।
आइतबार बिहान सबेरै थुप्रै रेस्टुरेन्ट र बारहरू रहेको क्षेत्रमा अचानक गोली चल्न थालेपछि सडकमा भागदौड मच्चिएको थियो । गोलीको आवाज आएको स्थानलाई पछ्याउँदै आएको प्रहरी ठूलो भिडमाझ पुगेको प्रहरी प्रमुख क्याथरिन लेस्टरले बताएकी छन् ।
यस घटनालाई लिएर अझैसम्म कुनै पनि शंकास्पद व्यक्तिलाई हिरासतमा लिइएको छैन ।
क्याथरिनले भनेकी छन्, “यो निकै दु:खद घटना हो । यस घटनामा संलग्नलाई पत्ता लगाउन सक्दो सूचना दिएर सहयोग गर्न स्थानीय सबैलाई अनुरोध गरिएको छ ।”
स्टेट क्यापिटल विल्डिङदेखि केही परका सडकहरूमा स्थानीय समयअनुसार बिहान करिब २ बजेतिर यो घटना घटेको हो ।
बन्दुक हिंसा अभिलेख वेबसाइकाअनुसार अमेरिकामा बर्सेनि गोलीकान्डमा करिब ४० हजार मानिसको ज्यान जाने गरेको छ ।
