जसप्रित बुमराहको उत्कृष्ट प्रदर्शनमा भारतले पहिलो एकदिवससीय अन्तर्राष्ट्रियमा घरेलु टोली इंग्ल्यान्डलाई १० विकेटले हराएको छ।
जितको लागि १ सय ११ रनको सामान्य लक्ष्य पछ्याएको भारतले १८.४ ओभरमा बिना कुनै विकेट क्षति पूरा गर्यो।
भारतको जितमा कप्तान रोहित शर्माले सर्वाधिक ७६ रन बनाए। ५८ बल खेलेका शर्माले ६ चौका र ५ छक्का प्रहार गरे। यस्तै शिखर धवनले ५४ बलमा ४ चौकासहित ३१ रन बनाए।
त्यसअघि लन्डनमा टस हारेर पहिला ब्याटिङ गरेको इंग्ल्यान्ड २५.२ ओभरमा अलआउट हुँदै १ सय १० रनमा समेटियो।
इङ्ल्याण्डलाई सस्तैमा रोक्न भारतका तीव्र गतिका बलर जस्प्रित बुमराहले करिअरकै उत्कृष्ट प्रदर्शन गरे। उनले ७.२ ओभरमा ३ मेडन राख्दै १९ रन खर्चेर ६ विकेट लिए।
मोहम्मद शामीले ७ ओभरमा ३१ रन खर्चेर ३ विकेट हात पारे।
अब दोस्रो खेल बिहीबार र तेस्रो खेल आइतबार हुनेछ।
