६ महिनादेखि रूससँग युद्ध लडिरहेको युक्रेनी सेनाले रूसी सैनिकको कब्जामा रहेको एउटा उत्तरपूर्वी सहर फिर्ता लिएको छ।

द न्युयोर्क टाइम्सका अनुसार रूसी सैनिकहरूले यसअघि कब्जा गरेको खार्किभ प्रान्तको इजिउम सहर छोडेर हिँडेका छन्।

युक्रेनका अधिकारीहरूले इजिउमबाट रूसी सैनिक फिर्ता हुनुलाई ठूलो सफलता मानेका छन्। गत मार्चमा रूसी सैनिकहरू युक्रेनको राजधानी किएभबाट फिर्ता भएका थिए। युद्ध सुरू गरेको ६ महिनापछि कब्जा गरेको अर्को सहर पनि रूसी सैनिकले छोड्नु युक्रेनका लागि ठूलो सफलता भएको बताइएको छ।

रूसी सैनिकहरूले इजिउमलाई डोनबस क्षेत्रमा आक्रमण गर्न लजिस्टिक बेसका रूपमा उपयोग गर्दै आएका थिए।

रूसी आक्रमण सुरू हुनुभन्दा पहिला इजिउममा ४० हजार मानिस बस्थे। धेरै जना सहर छोडेर गएपछि अहिले त्यहाँ १२ हजार जना मात्रै बाँकी छन्। रूसी सैनिक फर्किएपछि उनीहरूले खुसी मनाएका छन्।

पश्चिमा खुपिया एजेन्सीहरूले युक्रेनमा रूसी सैनिकतर्फ ठूलो हताहती भइसकेको बताइरहेका बेला इजिउमबाट फिर्ता हुनु रूसी सैनिक लागि ठूलो धक्का हो।