भोलि (शुक्रवार)देखि प्रदर्शनमा आउने तयारीमा रहेको सन्तोष पन्तको चलचित्र ‘हिजो आजका कुरा’को राजधानीमा प्रिमियर शो गरिएको छ ।
बुधवार बेलुका बानेश्वरस्थित वान सिनेमाज्मा आयोजित प्रिमियर शोमा थुप्रै चलचित्रकर्मी एवं सञ्चारकर्मीहरूले ‘हिजो आजका कुरा’ हेरे ।
किरण केसी, दीपकराज गिरी, दीपाश्री निरौला, जीतु नेपाल, केदार घिमिरे, विल्सनविक्रम राई लगायतले चलचित्रलाई राम्रो प्रतिक्रिया दिए ।
समसामयिक विषयवस्तुमा पारिवारिक चलचित्र बनेको कलाकारहरूले बताए ।
कुनै समयको सर्वाधिक चर्चित टेलिसिरियल ‘हिजो आजका कुरा’को नाममा चलचित्र निर्माण भएको हो ।
अभिनेता किरण केसीले चलचित्रको कथावस्तु, कलाकारहरुको अभिनय राम्रो लागेको बताए ।
अभिनेता दीपकराज गिरीले भने,‘हिजो आजका कुरा सिरियललाई जतिले मिस गरिरहनुभएको थियो, हलमा आएर चलचित्र हेर्न अनुरोध गर्छु । सिरियलको जुन फ्लेवर थियो, त्यही फ्लेवरसहित चलचित्र आएको छ ।’
टेलिभिजनमा पहिलोपटक अनुहार देखाएको ‘हिजो आजका कुरा’बाटै भएको स्मरण समेत दीपकराजले गरे ।
केदार घिमिरे र जीतु नेपालले पनि चलचित्र रमाईलो लागेको बताए ।
केदारले भने, ‘जसरी हामी हिजो आजका कुरा सिरियल हेर्दा समसामयिक विषयवस्तु हेर्न पाइन्थ्यो । चलचित्रमा पनि समसामयिक कुराहरू हेर्न पाइयो ।’
जीतुले आफूले पहिलोपटक अभिनय नै सन्तोष पन्तसँग गरेको स्मरण गर्दै चलचित्र राम्रो लागेको सञ्चारकर्मीमाझ बताए ।
‘हिजो आजका कुरा एउटा इतिहास हो । त्यो इतिहासलाई फेरि हेर्न पाइएको छ ।
सबै कलाकारहरूले राम्रो काम गर्नुभएको छ’ निर्देशक दीपाश्री निरौलाले चलचित्र हेरेपछि भनिन्, ‘पहिले टेलिभिजन हेरेका कुराहरु फेरि रिकल बनाएको छ ।’
अभिनेता विल्सनविक्रम राईले चलचित्रले आफूहरुले बिताएको बाल्यकालको क्षणमा लिएर गएको बताउँदै अगाडि भने, ‘सन्देशसहितको मिठो चलचित्र बनेको छ । नेपालीको घरघरको कथा छ । कलाकारहरुको अभिनय राम्रो छ ।’
प्रिमियरमा चलचित्रका निर्माता, निर्देशक एवं कलाकारहरु उपस्थित थिए ।
सन्तोष पन्त, साकार पन्त, अभिनेत्री रमा थपलिया, ऋचा शर्मा, केकी अधिकारी, दिव्यदेव पन्त, जेबिका कार्की, अनुष्का अधिकारी लगायत आफ्नो चलचित्रको प्रिमियरमा पुगेका थिए ।
प्रिमियरमा पाएको प्रतिक्रियाबाट निर्माण टिम निकै आशावादी देखिएको छ ।
पन्त फिल्म प्रोडक्सनको प्रस्तुती रहेको चलचित्रलाई सन्तोषका छोरा साकार पन्तले निर्देशन गरेका हुन् ।
चलचित्र सोलो रिलिज हुन लागेको हो ।
