चेल्सीलाई हराउँदै म्यान्चेष्टर सिटी इंग्लिस फुटबल लिग कप (कारवाओ) को अघिल्लो चरणमा प्रवेश गरेको छ।

सिटीले घरेलु मैदानमा गए राति भएको तेस्रो चरणको खेलमा चेल्सीलाई २–० ले हराउँदै चौथो चरणमा प्रवेश गरेको हो। सिटीको जितमा रियाद महारेज र जुलियन अल्भारेजले गोल गरे।

इतिहाद स्टेडियममा बुधबार राति चेल्सीले घरेलु टोली सिटीलाई पहिलो हाफमा बराबरीमा रोके पनि दोस्रो हाफमा रोक्न नसक्दा हार बेहार्न पुग्यो। सिटीले दोस्रो हाफमा ६ मिनेटको अन्तरमा दुई गोल गर्दै जित पक्का गरेको थियो।

खेलको ५३ औं मिनेटमा रियाद महारेजको गोलमार्फत सिटीले अग्रता लिएको थियो। ५८ औं मिनेटमा जुलियन अल्भारेजले गोल गरेपछि घरेलु टोलीले अग्रता दोब्बर पार्‍यो। त्यसपछि खेलमा कुनै पनि गोल नहुँदा सिटीले २-० को जित निकाल्यो।

यो जितसँगै सिटीले चौथो चरणमा स्थान बनाउँदा चेल्सी बाहिरिएको छ ।

प्रतियोगिताअन्तर्गतकै आ–आफ्नो खेलमा जित हात पार्दै चार्लटन, लिङ्कन सिटी, बर्नमाउथ, एमके डन्स, लेस्टर सिटी, बर्नेली, गिलिङ्घम, उल्भ्स, नोटिङ्घम फरेस्ट, ब्राइटन, ब्ल्याकबर्न रोभर्स, न्युकासल युनाइटेड र लिभरपुलले पनि चौथो चरणमा स्थान सुरक्षित गरेका छन्।