विद्रोहको औचित्य पुष्टि गर्न मतदाताको शरणमा ,रामकुमारी झाँक्री

तिनै झाँक्री अहिले प्रतिनिधिसभा सदस्यका लागि गुल्मी–२ बाट उठेकी छन्, जहाँ एमालेमा रहँदाका सहकर्मी गोकर्ण विष्ट प्रतिस्पर्धामा छन् ।

    • Bell Sanchar

    • २८ कार्तिक २०७९, सोमबार

विद्यार्थी राजनीतिको बेला रामकुमारी झाँक्री राष्ट्रिय चर्चामा रहिन्, त्यो पनि पटक–पटक । २०६२–६३ को जनआन्दोलनको अग्रमोर्चामा खटिंदा प्रहरी दमनमा रगताम्य भएका उनका तस्बिरहरू अहिले पनि सामाजिक सञ्जालमा भेटिन्छन् ।

नेकपा (एमाले)बाट विद्रोह गरेर नेकपा एकीकृत समाजवादी गठनको बेला लिएको अडानले पनि रामकुमारी झाँक्रीलाई चर्चामा ल्यायो । तिनै झाँक्री अहिले प्रतिनिधिसभा सदस्यका लागि गुल्मी–२ बाट उठेकी छन्, जहाँ एमालेमा रहँदाका सहकर्मी गोकर्ण विष्ट प्रतिस्पर्धामा छन् ।

झाँक्रीका लागि यो निर्वाचन पार्टी विभाजनको औचित्य पुष्टि गर्ने परीक्षा बनेको छ । उनलाई सत्तारुढ गठबन्धनको राम्रो साथ छ, तर प्रतिस्पर्धी छन्, एमालेमा आफ्ना सिनियर गोकर्ण विष्ट ।

गुल्मीको म्यालपोखरी गाउँमा जन्मिएकी ४५ वर्षीया झाँक्री विद्यार्थी संगठनबाट राजनीतिमा आएकी थिइन् । पुर्कोट दहको पृथ्वी माध्यमिक विद्यालयमा पढ्दा अनेरास्ववियुको प्रारम्भिक कमिटीमा संगठित भएकी उनी २०४७ मा प्रारम्भिक कमिटी सहसचिव, २०४९ मा कमिटी अध्यक्ष, जिल्ला कमिटी सदस्यहुँदै २०५० मा क्षेत्रीय कमिटी अध्यक्ष चुनिइन् । क्याम्पस पढ्न २०५१ मा काठमाडौं आएपछि पद्मकन्याको इकाइको सदस्य, सचिव हुँदै अध्यक्ष बनिन् ।

लामो समय विद्यार्थी राजनीतिमा बिताएकी झाँक्री २०५३ सालमा अनेरास्ववियुको काठमाडौं जिल्ला कमिटी सदस्य, २०५४ मा उपाध्यक्ष, २०५६ सालमा केन्द्रीय सदस्य हुँदै सचिवालय सदस्य र महिला विभाग प्रमुखमा दुई कार्यकाल बिताइन् ।

२०५७ र २०५९ मा अनेरास्ववियुको प्रचार विभाग प्रमुख, सम्पर्क विभाग प्रमुख, २०६३ मा केन्द्रीय उपाध्यक्ष र २०६५ मा केन्द्रीय अध्यक्ष निर्वाचित भइन् । २०७१ मा माउ पार्टी एमालेको केन्द्रीय सदस्य र २०७४ सालमा समानुपातिक सांसदको जिम्मेवारी पाइन् ।

एमाले विभाजनपछि २०७८ भदौबाट एकीकृत समाजवादीको सचिव रहेकी उनी २०७८ असोजमा शहरी विकासमन्त्री पनि बनिन् । २०६२÷६३ को जनआन्दोलनमा पटक–पटक घाइते भएकी, घाइते अवस्थामै हिरासतमा परेकी, राज्यविरुद्धको कसुरमा मुद्दा खेपेकी झाँक्री पहिलो पटक गुल्मी–२ बाट जनअनुमोदित हुने महासंग्राममा छिन् ।

चुनावी अंकगणित

गत स्थानीय चुनावमा वडाअध्यक्षका उम्मेदवारहरूले दलगत रूपमा पाएको मतमा गुल्मी-२ मा एमाले अगाडि छ । उक्त चुनावमा एमालेले ३१ हजार २५३, नेपाली कांग्रेसले २९ हजार ८२१ र माओवादी केन्द्रले १ हजार ८४१ मत ल्याउँदा समाजवादी केन्द्रले ६५८ मात्र मत पाएको छ ।

यो चुनावी नतिजाले झाँक्री सम्पूर्ण रूपमा सत्ता गठबन्धनका दलहरूको भरमा रहेको देखाउँछ । गठबन्धनको मत जोगाउँदै आफ्नो पूर्वपार्टी एमालेको मत तान्न सके उनको जित सम्भव देखिन्छ । यसका लागि उनी गठबन्धनको शक्ति र आफ्नो राष्ट्रिय छविको उपयोग गर्ने प्रयासमा छिन् ।

Nabintech
साताकाे चर्चित
सम्बन्धित