नेकपा एकीकृत समाजवादीका अध्यक्ष माधवकुमार नेपाल र जनता समाजवादी पार्टी (जसपा) का अध्यक्ष उपेन्द्र यादवले नेपाली कांग्रेसका सभापति शेरबहादुर देउवासँग छलफल गरेका छन्।
आज बिहान कांग्रेस पदाधिकारी बैठक बस्नुभन्दा पहिले अध्यक्ष नेपाल र यादवले सभापति देउवासँग उनकै निवास धुम्बाराहीमा कुराकानी गरेका हुन्।
उनीहरूले सभामुख निर्वाचनलगायत समसामयिक राजनीतिक घटनाक्रमबारे कुराकानी गरेका छन्। सभामुख पदका लागि आज दिउँसो १ बजेदेखि अपरान्ह ४ बजेसम्म मनोनयन दर्ता र बिहीबार निर्वाचनको कार्यक्रम छ।
उनीहरूबीच समामुख निर्वाचनमा मिलेर जाने विषयमा पनि कुराकानी भएको स्रोतको भनाइ छ।
गत पुस २६ गते कांग्रेस, एकीकृत समाजवादी र जसपाले प्रधानमन्त्री पुष्पकमल दाहाल प्रचण्डलाई विश्वासको मत दिए पनि यी दल सरकारमा भने सहभागी भएका छैनन्।
प्रतिनिधि सभामा कांग्रेसका ८९, जसपाका १२ र एकीकृत समाजवादीका १० सांसद छन्।
केही दिनअघि बसेको कांग्रेस पदाधिकारी बैठकले सभामुख तथा राष्ट्रपतिलगायत पदमा हुने निर्वाचनमा अन्य दलहरूसँग छलफल गरी अघि बढ्न सभापति देउवालाई जिम्मेवारी दिएको थियो।