भारतले जुलाई ३ र ४ मा शाङ्हाई कोअपरेशन अर्गनाइजेशनको शिखर सम्मेलन आयोजना गर्ने भएको छ ।उक्त समारोहमा रुसका राष्ट्रपति भ्लादिमिर पुटिन सहभागी हुने बताइएको छ ।

गोवामा मे ४ र ५ मा हुने एससीओका परराष्ट्रमन्त्रीहरूको बैठकमा शिखर सम्मेलनका एजेन्डालाई अन्तिम रूप दिइने अपेक्षा छ । यस सम्मेलनले प्रतिआतंकवाद, अफगानिस्तानमा स्थिरता, समावेशी सम्पर्क पहल लगायतका विषयलाई समेट्ने दी इकोनोमिक टाम्स पत्रिकाले खबर दिएको छ ।

पुटिन यस सम्मेलनमा सहभागी हुने अपेक्षा गरिएको भए पनि चीनका राष्ट्रपति सी चिनपिङ आउने नआउने निश्चित छैन । गलवान हिंसापछि भारत र चीनबीच न्यानो द्विपक्षीय सम्बन्ध छैन । भौतिक रूपमा उपस्थित नभए पनि सीले सम्मेलनलाई भर्चुअल रूपमा सम्बोधन गर्न सक्छन् ।

पाकिस्तानका प्रधानमन्त्री शहबाज शरीफले पनि सम्मेलनमा भौतिक वा भर्चुअल उपस्थितिको संकेत दिइसकेका छैनन् ।

यस सम्मेलनमा पुटिन र भारतका प्रधानमन्त्री नरेन्द्र मोदीबीचको द्विपक्षीय वार्ता हाइलाइटका रूपमा रहनेछ । युक्रेन युद्ध शुरू भएयता पुटिनको यो पहिलो भारत भ्रमण हुनेछ ।