काठमाडौँ

नेपाल–अमेरिका पत्रकार सङ्घ (नेजा) ले आयोजना गरेको ‘प्रवासमा नेपाली पत्रकारिता र नेपाली सञ्चार क्षेत्रका अपेक्षा’ विषयमा अन्तरक्रिया सम्पन्न भएको छ ।

समापन कार्यक्रममा प्रेस काउन्सिल नेपालका अध्यक्ष बालकृष्ण बस्नेतले सङ्ख्यात्मक भन्दा गुणत्मक पत्रकारिता गर्न आग्रह गनुभयो । “थोरै समाचार प्रकाशन गर्नुस् र मौलिक पत्रकारितालाई विशेष ध्यान दिनुहोस्”, उहाँले भन्नुभयो, “समाचार कति धेरै प्रकाशित गरे भन्नु भन्दा पनि कति महत्वपूर्ण प्रकाशित गरे भन्ने बारे सोच्नुहोला ।”

पत्रकार भागिरथ योगीले प्रवासमा रहेका पत्रकारहरुको ‘एक पत्रकार एक अनलाइन’ रहेको भन्दै अधिकांशले समाचार हुबहु (कपी पेष्ट) गर्ने गरेका बताउनुभयो । “विदेशमा रहेर कलम चलाउनेहरुको आफ्नै अनलाइन हुन्छ”, उहाँले भन्नुभयो, “समाचार पनि ‘कपी पेस्ट’ गर्ने बाहेक अरु केही छैन । यसलाई व्यवस्थित गरी व्यावसायिक रुपमा अगाडि बढ्नुपर्छ ।”

पत्रकार शरदचन्द्र वस्तीले भविष्यको पत्रकारिताबारे सोच्न जरुरी रहेको बताउनुभयो । अहिलेको भन्दा अबको १० वर्षपछि कस्तो पत्रकारिता गर्ने भन्नेबारे सबैले सोच्न आवश्यक रहेको भन्दै उहाँले प्रविधिको विकाससँगै पत्रकारिताको संरचना पनि परिवर्तन गर्नुपर्नेमा जोड दिनुभयो ।

अनलाइन खबरका प्रधान सम्पादक शिव गाउँलेले परदेशमा रहेर पत्रकारिताको माध्यमबाट नेपाललाई चिनाउन आग्रह गर्नुभयो । “विदेशमा सञ्चालित सञ्चार माध्यमले नेपाली समाजका वास्तविकता समाचारमार्फत सम्प्रेषण गर्नुपर्छ”, उहाँले भन्नुभयो, विदेशी भूमिमा समस्या परेकालाई सञ्चारका माध्यमबाट सहयोग गर्नुपर्छ ।”

नेपाल पत्रकार महासङ्घका महासचिव रोशन पुरीले विदेशी भूमिमा रहेर पत्रकारिता पेसा गर्ने पत्रकारले राजनीतिकमा धेरै चासो नराख्न आग्रह गर्नुभयो । उहाँले भन्नुभयो, “राजनीतिक चर्चा भन्दा विभिन्न स्थानका नेपालीलाई एकजुट बनाउनु सहयोग गर्नुपर्छ ।”