काठमाडौं ।

नेपाली राष्ट्रिय फुटबल टिमका प्रमुख प्रशिक्षक भिन्सेन्जो अल्बर्टो एनेस र कप्तान किरणकुमार लिम्बुले आफूहरुले विश्वकप छनोटमा यमनविरुद्धको खेल जित्न चाहेको बताएका छन् ।

विश्वकप छनोटको समूह चरणमा आफ्नो दोस्रो खेल नेपालले भोलि मंगलबार काठमाडौंको दशरथ रंगशालामा खेल्दै छ ।

‘हामी यो खेल जित्न चाहन्छौं, समर्थकलाई आशा दिलाउनका लागि पनि जित्न चाहन्छौं,’ एनेसले भने, ‘हामी अंक जोड्न चाहन्छौं ।’

नेपालले यसअघि सन् २०१९ को एसिया कपका लागि  छनोटमा यमनसँग खेलेकाे थियो ।

जसमध्ये सन् २०१७ मा सशस्त्र प्रहरी बलको मैदान हल्चोकमा भएको खेल गोलरहित बराबरी भएको थियो । तर कतारमा भएको अवे खेलमा भने नेपाल यमनसँग २-१ ले पराजति भएको थियो

यमनसँगको खेलमा नेपालका लकेन लिम्बु खेल्ने छैनन् । उनको खुट्टा भाँचिएकाले खेल्न नसक्ने एनेसले जानकारी दिए ।

चोटका कारण यूएईसँगको खेल नखेलेका अनन्त तामाङले यमनसँगको खेल खेल्ने नखेल्ने अझै टुंगो छैन । उनका बारेमा मेडिकल टिमसँग सल्लाह गरेर निर्णय गर्ने प्रशिक्षक एनेसले बताए ।