काठमाडाैं ।
शेयर बजारमा कारोबार रकमले पुन नयाँ कीर्तिमान कायम गरेको छ । साताको दोस्रो दिन सोमबार शेयर बजारमा कारोबार रकमले २७ अर्ब २४ करोड रुपैयाँको नयाँ रेकर्ड बनाएको हो ।
अघिल्लो दिन आइतबार मात्रै २५ अर्ब ७७ करोड ९४ लाख ५३ हजार रुपैयाँको कारोबार भएर बनेको रेकर्डलाई सोमबारको कारोबारले तोडेको छ ।
सोमबार नेपाल स्टक एक्सचेन्ज (नेप्से) परिसूचक ७०.८१ अङ्कले बढेर २९३१.६५ को बिन्दुमा कायम भएको छ ।
यस दिन बजारमा ६ करोड ४८ लाख ७६ हजार २१७ कित्ता शेयरको खरिदबिक्री हुँदा २७ अर्ब २४ करोड २० लाख ३४ हजार रुपैयाँको कारोबार भएको छ ।
अघिल्लो दिन आइतबार मात्रै नेप्से परिसूचक ९४.५३ अङ्कले बढेर २८६० को बिन्दुमा कायम भएको थियो, जहाँ ६ करोड ३ लाख २१ हजार ३२३ कित्ता शेयरको खरिदबिक्री हुँदा २५ अर्ब ७७ करोड ९४ लाख ५३ हजार रुपैयाँको कारोबार भएको थियो ।
आज एकै दिन ११ कम्पनीको सेयर सकारात्मक सकिर्ट लेबलमा कारोबार भएको छ ।
सोमबार सूर्यज्योति लाइफ इन्स्योरेन्स कम्पनी, हिमालयन लाइफ इन्स्योरेन्स, जोशी हाइड्रोपावर डेभलपमेन्ट कम्पनी, रसुवागढी हाइड्रोपावर कम्पनी, स्वितगंगा हाइड्रोपावर एन्ड कन्स्ट्रक्सन, सुभम पावर, भिजन लुम्बिनी उर्जा कम्पनीको सेयर १० प्रतिशतले बढेको छ भने यिनका लगानीकर्ताहरूले सर्वाधिक नाफा समेत कमाएका छन् ।
कारोबारका आधारमा हिमालयन रिइन्स्योरेन्स १ अर्ब २२ करोड ८० लाख ७२ हजार रुपैयाँका साथ शीर्ष स्थानमा रहेको छ ।
त्यस्तै, उपसमूहतर्फ इन्भेस्टमेन्ट इन्डेक्स र मेन्युफ्याक्चरीङ एन्ड प्रोसेसिङ बाहेकका ११ वटै समूहको सेयर मूल्य बढेको छ ।
