जुम्ला ।

जिल्ला प्रहरी कार्यालय जुम्लाले भरुवा बन्दुकसहित एक जनालाई पक्राउ गरेकाे छ ।

पक्राउ पर्नेमा गुठिचौर गाउँपालिका वडा नम्बर १ का ३२ वर्षीय सुर्यवहादुर महतारालाई प्रहरीले भरुवा बन्दुकसहित पक्राउ गरेकाे छ ।

महतारा पातारासी गाउँपालिकाकाे वडा नम्बर ३ लासी बजारमा माेटर साइकलकाे ग्यारेज खाेलेर बसेका थिए । उनले अवैध रुपमा बन्दुक लुकाइछिपाई गरेर राखेकाे सुचनाकाे आधारमा प्रहरीले अनुसन्धान सुरु गरेकाे थियाे ।

गुठिचौरकाे मौरे लेख जुम्ला र डाेल्पा जाने सडककाे करिब ५० मिटर तल ओढारमा लुकाएर राखेकाे अवस्थामा बन्दुक बरामद गरेकाे जिल्ला प्रहरी कार्यालय जुम्लाका प्रमुख डिएसपी छेदीलाल कामतीले बताए ।

कामतीका अनुसार बन्दुक तीन पार्टमा विभाजन गरेर सेताे प्लाष्टिककाे बाेरामा राखिएको अवस्थामा भेटिएको हाे । अवैध रुपमा बन्दुक प्रयाेग गर्ने महतारा माथि अनुसन्धान सुरु भइसकेको प्रहरीले जनाएका छन् ।