काठमाडाैं ।
सहकारी ठगी छानबिन संसदीय समितिको प्रतिवेदन कार्यान्वयनका लागि संसद्ले सरकारलाई पठाएको छ ।
सोमबार बसेको प्रतिनिधि सभा बैठकमा समितिका सभापति सूर्य थापाले प्रतिवेदन पेश गरेका थिए ।
प्रतिवेदन पेश गर्दै सभापति थापाले समग्र सहकारी समस्या समाधानका लागि समितिले सुझाव दिएको बताए ।
उनले समितिको प्रतिवेदन कार्यान्वयन हुने विश्वास व्यक्त गरे ।
समितिमा प्रतिवेदन पेश भएलगत्तै सभामुख देवराज घिमिरेले ‘आवश्यक कायार्थ नेपाल सरकारलाई पठाउन’ निर्देशन दिएका छन् । समितिले सहकारी ठगीमा संलग्नमाथि कारबाहीको सुझाव दिएको छ ।
तत्कालीन गृहमन्त्री रवि लामिछाने सहकारी ठगीमा संलग्न रहेको भन्दै नेपाली कांग्रेसले समिति गठनको माग गरेपछि जेठ १५ गते संसदीय छानबिन विशेष समिति गठन भएको थियो ।
समितिले सहकारीमार्फत गोरखा मिडिया नेटवर्कमा आएको रकम खर्चमा लामिछानेको संलग्नताको निष्कर्षसहित कारबाही सिफारिश गरेको छ ।
