भक्तपुर ।

भक्तपुर नगरपालिकाले भक्तपुर बहुमुखी क्याम्पसको गेट, खानेपानी ट्याङ्कीलगायत संरचना भत्काएको छ । क्याम्पससँगै रहेको भाजु पोखरीको दक्षिणतर्फ २० फिटको सडक खोल्न भन्दै नगरपालिकाले क्याम्पसको संचरनामा डोजर चलाएको हो । आफूहरूलाई जानकारी नै नदिई डोजर लाएर संरचना भत्काएपछि क्याम्पस प्रशासनले सुरक्षाको माग गरेको छ ।

क्याम्पस प्रमुख कविता लुइँटेलले त्रिभुवनविश्व विद्यालयअन्तर्गत रहेको क्याम्पसमा नगरपालिकाले संरचना भत्काएको बताइन् । ‘पोखरीमा बाटो बनाउन नगरपालिकाले क्याम्पसको जग्गा मागिरहेको थियो, मैले दिन मिल्दैन, यो त्रिभुवन विश्वविद्यालयको जग्गा हो, उसको निर्णय आउन कुरिदिनुस् भनेको थिएँ, तर नगरपालिकाले कुनै जानकारी नै नदिई डोजर ल्याएर क्याम्पसको संरचना भत्काएको छ, क्याम्पसको अर्बौंको सम्पत्तिसमेत जोखिममा परेको छ ।’

त्रिभुवन विश्वविद्यालयले गठन गरेको जग्गा छानविन आयोगले बुधबार मात्रै स्थलगत अवलोकन गरेर गएको र त्यसको प्रतिवेदन बुझाएपछि आएको निर्णयनुसार दुवैको सहमतिमा काम गर्ने भनेर नगरपालिकालाई भनेको उनले बताइन् ।

क्याम्पस प्रमुख लुईटेलले भनिन्, ‘नगरपालिकाले पठाएको प्रत्येक पत्र विश्वविद्यालयका उपकुलपति र रजिष्ट्रारलाई पठाएका छौँ, उताबाट जवाफ नआउँदै नगरपालिकाले डोजर चलायो, दुई घण्टा कुरिदिनुस् विश्वविद्यालयमा यसबारे बैठक बस्दैछ भन्दा पनि मानेन ।’

क्याम्पस कल्याण कोषका संयोजक शेरसिंह राईखोलाले नगरपालिकासँग कसरी सहमति गरेर जान सकिन्छ भनेर पटक पटक आफैं बसेर छलफल गरिरहेको अवस्थामा अचानक सरकारी संरचनामाथि डोजर चलाएर क्याम्पसको जग्गा कब्जा गरिएको बताए ।नगर प्रमुख सुनिल प्रजापतिले भाजु पोखरी निर्माण सम्पन्न भइसकेको अवस्थामा क्याम्पसले ओगटेको जग्गामा २० फिटको सडक बनाउन खोज्दा वर्षौदेखि अटेरगरी बसेकाले बाध्य भएर डोजर चलाउनुपरेको बताए ।

उहाँले २०२१ सालको नक्सामा उक्त जग्गा पोखरीको डिल भएको उल्लेख रहेको र पोखरीको जग्गा क्याम्पसले ओटगेकाले उक्त जग्गामा पोखरीको दक्षिणतर्फ परम्परागत शैलीमा सडक निर्माण गर्न केही सामान्य संरचना भत्काइएको बताउनुभयो ।