काठमाडौं ।
इजरायलले आइतबार राति सिरियाको तटीय सहर टार्टसमा हवाई आक्रमण गरेको छ। उक्त आक्रमणमा टार्टसका सैन्य केन्द्रहरूलाई निशाना बनाइएको थियो ।
गोलीबारुद र हतियार भण्डार गरेको भनिएको त्यस स्थानमा इजरायलले आक्रमण गरेपछि ठूलो विस्फोट भएको अन्तर्राष्ट्रिय सञ्चार माध्यमहरूले जनाएका छन् ।
सिरियन वार मनिटरले इजरायलको यो आक्रमणलाई पछिल्लो दशकमा टार्टसमा भएको सबैभन्दा ठूलो आक्रमण भनेको छ। इजरायली फाइटर जेटहरूले एयर डिफेन्स युनिट र जमिनदेखि जमिनसम्म प्रहार गर्नसक्ने मिसाइलहरूको डिपोमा समेत निशाना बनाएका थिए ।
मिडिया रिपोर्टहरूका अनुसार शक्तिशाली विस्फोटपछि टार्टसमा ३.१ म्याग्निच्युडको भूकम्प महसुस गरिएको थियो। आक्रमणका धेरै भिडियोहरू सामाजिक सञ्जालमा भाइरल भएका छन्।
रूसी कूटनीतिज्ञहरू फिर्ता
यसैबीच, रूसले सिरियामा जारी इजरायली आक्रमण र विद्रोही समूहको नियन्त्रणका कारण आफ्ना कूटनीतिज्ञहरूलाई फिर्ता बोलाएको छ।
रूसी विदेश मन्त्रालयका अनुसार एयरफोर्सको विशेष फ्लाइटमार्फत खमीमिम एयरपोर्टबाट दमास्कसमा रहेका केही रूसी कूटनीतिज्ञहरूलाई रूस फिर्ता लगिएको छ।
रूसी कूटनीतिज्ञहरूका साथै बेलारुस र उत्तर कोरियाका कूटनीतिज्ञहरूलाई पनि यसै विमानबाट फिर्ता लगिएको जनाइएको छ। तर, मन्त्रालयले दमास्कसमा रहेको दूतावासले टेलिग्रामको सहारामा अझै आफ्नो काम जारी राख्ने स्पष्ट पारेको छ।
यसैबीच संयुक्त अरब एमिरेट्सले गोलान हाइट्समा नागरिकहरूको संख्या दोब्बर पार्ने इजरायली योजनाको निन्दा गरेको छ। यसअघि, इजरायलले आइतबार गोलान हाइट्समा नागरिक संख्या बढाएर दोब्बर बनाउने घोषणा गरेको थियो।
यसका लागि इजरायलका अन्य भागका नागरिकहरूलाई गोलान हाइट्समा राख्ने योजना सार्वजनिक गरिएको थियो । यूएईका साथै इरान र साउदी अरबले पनि इजरायलको यस कदमको आलोचना गरेका छन्।
इजरायलले गोलान हाइट्समा सन् १९६७ मा कब्जा जमाएको थियो। यो क्षेत्र यसअघि सिरियाको हिस्सा थियो, जसलाई ६ दिनसम्म चलेको युद्धपछि इजरायलले जितेको थियो।
सिरियाले यस क्षेत्रमा कब्जा हटाउन इजरायलसँग माग गरेको छ, तर इजरायलले सुरक्षा चिन्ता जनाउँदै यो माग अस्वीकार गरेको छ।
गोलान हाइट्समाथि इजरायली कब्जालाई सन् २०१९ मा तत्कालीन अमेरिकी राष्ट्रपति डोनाल्ड ट्रम्पले मान्यता दिएका थिए।
यसअघि इस्लामी विद्रोही समूह हयात तहरीर अल–शाम (एचटीएस) का नेता अबु मोहम्मद अल-जुलानीले सिरियामाथि गरिएको इजरायली आक्रमणको आलोचना गर्दै सिरिया युद्धबाट थाकिसकेको बताएका थिए ।
