काठमाडौं ।

दक्षिण कोरियामा आज बिहान भएको विमान दुर्घटनामा १७९ जनाको मृत्यु भएको अधिकारीहरुले पुष्टि गरेका छन्।

थाइल्याण्डको बैंककबाट आएको जेजु एयरको विमान मुआन अन्तर्राष्ट्रिय विमानस्थलमा अवतरणको क्रममा दुर्घटनाग्रस्त भएको हो।

विमानमा १८१ जनामध्ये एक चालक दलका सदस्य र एक यात्रु महिलाको जीवित उद्धार गरिएको छ। उद्धारकर्ताले दुर्घटनालगत्तै उनीहरुलाई मोकपो अस्पतालमा उपचारका लागि पठाएका छन्।

विमान धावनमार्गमा चिप्लिएर बारमा ठोक्किएपछि विमानमा आगो लागेको थियो। दुर्घटनामा अन्य कोही जीवित फेला नपरेको अधिकारीहरुले बताएका छन्।

यो दुर्घटना दक्षिण कोरियाको जेओला प्रान्तको मुआन काउन्टीस्थित मुआन अन्तर्राष्ट्रिय विमानस्थलमा भएको हो, जुन सियोलबाट २८८ किलोमिटर दक्षिण पश्चिममा पर्छ।