चितवन ।
नारायणगढ-मुग्लिन सडकखण्ड अन्तर्गत सिमलताल नजिकै भएको बस दुर्घटनामा ६ जना यात्रु घाइते भएका छन्।
बुटवलबाट पोखरा जाँदै गरेको लु १ ख ८५५१ नम्बरको बसले सडक किनारमा बिग्रिएर रोकिराखेको मधेश प्रदेश ०३–००२ ख २१५९ नम्बरको ट्रकलाई पछाडिबाट ठक्कर दिँदा दुर्घटना भएको हो।
दुर्घटना आज बिहान करिब ४:३० बजे जलविरेबाट दुई किलोमिटर नारायणगढतर्फको क्षेत्रमा भएको थियो ।
बसको ठक्करका कारण घाइते भएका यात्रुहरुलाई चितवनको भरतपुर अस्पतालमा उपचारका लागि पठाइएको छ।
सबै घाइतेहरूको अवस्था खतरामुक्त रहेको इलाका प्रहरी कार्यालय मुग्लिनकी प्रमुख इन्सपेक्टर निरला भण्डारीले जानकारी दिइन्।
सडक छेउमा रोकिराखेको ट्रकको पछाडि बस ठोक्किँदा दुर्घटना भएको हो। घटनाको थप अनुसन्धान भइरहेको प्रहरीले जनाएको छ।
यस सडकखण्डमा हुने दुर्घटनालाई न्यूनीकरण गर्न सावधानी अपनाउनुपर्ने र बिग्रिएका सवारी साधनलाई सुरक्षित रूपमा व्यवस्थापन गर्न आवश्यक रहेको स्थानीयले बताएका छन्।
