नेपाल एमालेका अध्यक्ष तथा पूर्वप्रधानमन्त्री केपी ओलीको जन्मदिनको अवसर पारेर युवा संघले गत वर्षदेखि केपी ओली कप फुटबल आयोजना गर्दै आएको छ । नेताको मृत्युपछि सम्मान गर्ने भन्दा पनि जीवनकालमै सम्मान दिने उद्देश्यले उनकै नामबाट फुटबल प्रतियोगिता आयोजना गर्न लागेको अध्यक्ष थेवेले बताए ।
थेवेले फुटबल प्रतियोगिता चार ११ लाई प्राथमिकता दिएको बताए । ‘हामीले चार ११ लाई प्राथमिकता दिएका छौँ । फागुन ११औं महिना र प्रतियोगिता पनि ११ गते सुरु गर्दैछौँ । यसको विजेताले पुरस्कार पनि ११ लाख पाउनेछन् भने फुटबलमा पनि एक टिमबाट ११ जना खेल्छन् ।’
उनका अनुसार उपविजेताले ५ लाख पाउने छ । प्रतियोगिताको सर्वोत्कृष्ट खेलाडीलाई एक लाख रुपैयाँ नगद पुरस्कार प्रदान गरिने आयोजकले जनाएको छ ।
सर्वोत्कृष्ट गोलरक्षक, सर्वोत्कृष्ट गोलकर्ता र उदीयमान खेलाडीलाई पनि जनही ५० हजार रुपैयाँ पुरस्कार प्रदान गरिने । हरेक खेलको म्यान अफ दी म्याचले १५ हजार प्राप्त गर्नेछन् । यसका अतिरिक्त हरेक खेलको विजेता टोलीले २५ हजार रुपैयाँ पुरस्कार प्राप्त गर्नेछ ।
प्रतियोगिताको खेलहरु च्यासलस्थित मैदानमा हुने र फाइनल खेल दशरथ रंगशालमा खेलाइने आयोजक युवा संघका अध्यक्ष थेवेले जानकारी दिए । फाइनल खेलमा मात्र टिकट राखिएको र त्यसबाट उठेको रकमको ५ प्रतिशत विभिन्न च्यारिटीमा खर्च गरिने उनले जानकारी दिए ।
गत वर्ष भएको पहिलो संस्करणमा मछिन्द्र एफसीले सातदोबाटो युथ क्लबलाई सडनडेथमा हराएर उपाधि जितेको थियो ।
