काठमाडौं ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले हालसालैको सरकारी कदमहरूले संघीय लोकतान्त्रिक गणतन्त्रलाई जोखिममा पारेको टिप्पणी गरेका छन्।

चितवनको माडीस्थित सोमेश्वर माध्यमिक विद्यालयको स्वर्ण महोत्सवको अवसरमा बोल्दै प्रचण्डले संविधान, लोकतन्त्र, समावेशिता, र समानताको संरक्षणमा असफलता देशलाई राजनीतिक संकटतर्फ धकेल्न सक्ने चेतावनी दिए। उनले जनप्रतिनिधि र आमजनतालाई आफ्नो ठाउँबाट आवाज उठाउन आह्वान गरे।

प्रचण्डले आफ्नो नेतृत्वमा सरकार हुँदा केही सकारात्मक पहलहरू भएको दाबी गर्दै हालका सरकारले ती पहलहरूलाई कमजोर बनाउने प्रयास गरिरहेको आरोप लगाए। उनले हालै ल्याइएका पाँच अध्यादेशहरूलाई लोकतन्त्रको मर्यादा विपरीत भएको बताउँदै सदनलाई छलेर अध्यादेशमार्फत् शासन गर्न खोज्नु लोकतन्त्रको भावना विपरीत भएको भने।

समितिमा विचाराधीन विधेयकलाई फिर्ता लिएर अध्यादेश बनाउने सरकारी कदमप्रति पनि प्रचण्डले आपत्ति जनाए।

यसरी प्रचण्डले सरकारका पछिल्ला कदमहरूप्रति गम्भीर आपत्ति जनाउँदै संघीय लोकतान्त्रिक गणतन्त्रको रक्षा गर्न सबैलाई सचेत हुन आग्रह गरेका छन्।