बैतडी ।
बैतडीको सिगास गाउँपालिका–१ माडौंमा आज बिहान भएको जिप दुर्घटनामा दुईजनाको मृत्यु भएको छ।
दुर्घटनामा ज्यान गुमाउनेहरूमा सिगास गाउँपालिका–१ इरानाकी १४ वर्षीया जयन्ती धामी र १९ वर्षीया पार्वती धामी रहेको जिल्ला प्रहरी कार्यालयका प्रहरी निरीक्षक बलराम पाण्डेले जानकारी दिएका छन्।
प्रहरीका अनुसार, सुपप्र ०१००१ च ४०२८ नम्बरको जिप सडकबाट करिब पाँच सय मिटर तल खसेर दुर्घटना भएको हो।
दुर्घटनामा गम्भीर घाइते भएका दुवैजनाको डडेल्धुरा अस्पतालमा उपचारका क्रममा ज्यान गएको हो।
दुर्घटनाको कारणबारे अनुसन्धान भइरहेको प्रहरी निरीक्षक पाण्डेले जानकारी दिए।
