नेकपा एमालेका महासचिव शंकर पोखरेलले वर्तमान सरकार सञ्चालनमा नेपाली कांग्रेस र नेकपा एमाले बीचको सहकार्य मजबुत रहेको बताएका छन्। बर्दिबासमा प्रेस चौतारी नेपालले आयोजना गरेको पत्रकार सम्मेलनमा उनले भनें, “हामीबीच कुनै अलमल वा जालझेल केही छैन, हामी दुवै दलले स्पष्टताका साथ यो अहिलेको प्रतिनिधिसभाको कार्यकालभरि स्थिर सरकार दिने वाचा गरेका छौँ।”

महासचिव पोखरेलले भने कि दुई दलको सहमति मुलुकको समृद्धि र विकासका लागि महत्वपूर्ण छ। यस सहकार्यले मुलुकमा राजनीतिक अस्थिरता हटाउन मद्दत पुर्याउने विश्वास व्यक्त गर्दै उनले, “पछिल्लो समय सरकार बनेपछि आम जनतामा स्थिरताको अनुभूति भएको छ र यसले आर्थिक सूचकहरूमा सुधार ल्याएको छ,” भने।

उनले आगामी निर्वाचनमा स्पष्ट बहुमतको सरकार बन्नुपर्ने आवश्यकता उल्लेख गर्दै आफूहरूको दल ‘मिसन-२०८४’ अभियानमा अघि बढिरहेको बताए। “मुलुकको समृद्धिको सपना एमालेले देखेको छ, मधेसदेखि पहाड र हिमालसम्म, सबै क्षेत्रको सन्तुलित विकास एमाले नेतृत्वमा सम्भव छ,” उनले जोड दिए।

पोखरेलले एमाले नेतृत्वको सरकारले मधेसमा सडकमार्गको विकास र हराभरा बनाउन सुनकोसी मरिन डाइभर्सनको काम अघि बढाएको बताएका छन्। यससँगै, मधेसी जनतामा एमाले नेतृत्वमा विकास हुने विश्वास बढ्दै गएको पनि उनका अनुसार प्रमाणित भएको छ।

त्यस्तै, उनले मधेसको शिक्षा प्रणालीलाई तन्दुरुस्त बनाउन र यहाँका प्राकृतिक सम्पदाको अनियन्त्रित दोहन रोक्न आवश्यक रहेको बताएका छन्। महासचिव पोखरेलले जनताको प्रतिरोधका लागि आवाज उठाउन आग्रह गरे।

कार्यक्रममा एमालेका केन्द्रीय सङ्गठन विभाग प्रमुख काशीनाथ अधिकारी, मधेस इञ्चार्ज लीलानाथ श्रेष्ठ, पोलिटब्युरो सदस्य सुमनराज प्याकुरेल र ज्वाला साह, तथा मधेश प्रदेशका अध्यक्ष चन्द्रेश्वर मण्डलको उपस्थितिमा पार्टीको तीनमहिने सङ्गठन सुदृढीकरण अभियानका विभिन्न गतिविधिहरूको चर्चा भएको छ।