जुम्ला।
प्रेस सेन्टर जिल्ला समिति जुम्लाले आफ्नो २१औं स्थापना दिवस विविध कार्यक्रमसहित मनाएको छ। दिवसको अवसरमा प्रेस सेन्टरका संस्थापक सदस्य एवं नेपाल पत्रकार महासंघ जुम्लाका संस्थापक सहसचिव स्वर्गीय पत्रकार पदमराज देवकोटाको स्मृतिमा उनको घरमै विशेष कार्यक्रमको आयोजना गरिएको हो।
यस अवसरमा पदमराज देवकोटा स्मृति पत्रकारिता पुरस्कार बाट कान्तिपुर दैनिकमा कार्यरत पत्रकार धनबहादुर बुढा (डिवी) सम्मानित हुनुभएको छ। नेकपा (माओवादी केन्द्र) जुम्लाका जिल्ला संयोजक नवराज न्यौपानेले उहाँलाई नगद पाँच हजार रुपैयाँसहित प्रमाणपत्र प्रदान गर्नुभयो।
साथै, स्वर्गीय पत्रकार पदमराज देवकोटाका आमा विष्णुमाया देवकोटालाई पनि सम्मानस्वरूप पछ्यौरा ओढाइएको थियो।
नेकपा (माओवादी केन्द्र) जुम्लाका संयोजक नवराज न्यौपानेले प्रेस सेन्टरले आफ्नो कलमलाई अझ सशक्त र अग्रगामी बनाउँदै लैजाने विश्वास व्यक्त गर्नुभयो। साथै, परिवर्तनका लागि सहिदहरुले पुर्याएको योगदानको सधैं सम्मान गर्नुपर्ने दायित्व सबैमा रहेको बताउँदै, विशेष कार्यक्रम आयोजना गरेकोमा प्रेस सेन्टर जुम्लालाई धन्यवाद ज्ञापन गर्नुभयो।
प्रेस सेन्टर नेपालका केन्द्रीय सदस्य तथा नेपाल पत्रकार महासंघ जुम्लाका पूर्व अध्यक्ष नेत्रबहादुर शाहीले प्रेस सेन्टरको स्थापना संघर्षबाट सुरु भएको बताउँदै जुम्लामा प्रेस सेन्टरले लामो समयदेखि गरेको पत्रकारिताको लगावबारे चर्चा गर्नुभयो। साथै, स्वर्गीय देवकोटाको स्मृतिमा स्थापना गरिएको पुरस्कारले जुम्ली पत्रकारितामा सकारात्मक प्रभाव पार्ने विश्वास व्यक्त गर्दै पत्रकार डिवी बुढालाई बधाई दिनुभयो।
दलित मुक्ति मोर्चा जुम्लाका अध्यक्ष चन्द्रबहादुर नेपालीले युद्धकालमा स्वर्गीय पदमराज देवकोटाले पत्रकारितामा पुर्याएको योगदानको प्रशंसा गर्दै प्रेस सेन्टरले सहिदकै नाममा पुरस्कार स्थापना गरेर छुट्टै उदाहरण प्रस्तुत गरेको बताउनुभयो। उहाँले सहिद देवकोटाको घरमा सम्मान कार्यक्रम आयोजना हुनु गौरवको कुरा भएको उल्लेख गर्नुभयो।
एकीकृत अखिल नेपाल शिक्षक संगठन जुम्लाका इन्चार्ज रामबहादुर रावलले प्रेस सेन्टरको स्थापना दिवसको शुभकामना व्यक्त गर्दै यसले जुम्ली पत्रकारितालाई थप सशक्त र प्रभावकारी बनाउन योगदान पु¥याउने विश्वास व्यक्त गर्नुभयो।
कार्यक्रममा प्रेस सेन्टरका पदाधिकारी, सदस्य र शुभेच्छुकहरूको उत्साहजनक सहभागिता रहेको थियो। स्थापना दिवसका अवसरमा स्वर्गीय पत्रकार देवकोटाको स्मृतिमा आयोजित पुरस्कार वितरण र सम्मान कार्यक्रमले जुम्ली पत्रकारितामा नयाँ ऊर्जा थप्ने विश्वास गरिएको छ।
