काठमाडौं।

हाल नेपालमा पश्चिमी वायुको प्रभाव रहेको जल तथा मौसम विज्ञान विभागले जनाएको छ। कोशी र गण्डकी प्रदेशका पहाडी भूभागमा आंशिकदेखि साधारणतया बदली रहेको छ भने बाँकी स्थानमा मौसम सफा रहेको छ। तराईका धेरै स्थानमा बिहान हुस्सु लाग्ने देखिएको छ, जसले दैनिक जनजीवनमा प्रभाव पार्न सक्छ।

विभागका अनुसार आज दिउँसो कोशी, बागमती, गण्डकी र कर्णाली प्रदेशका पहाडी भू–भागमा आंशिकदेखि साधारणतया बदली रहनेछ, भने अन्य स्थानमा मौसम सफा रहनेछ। कोशी र गण्डकी प्रदेशका उच्च पहाडी तथा हिमाली भेगमा एक-दुई स्थानमा हल्का हिमपातको सम्भावना रहेको छ।

रातिको समयमा पनि पहाडी भूभागमा आंशिकदेखि साधारण बदली रहनेछ भने अन्य स्थानमा मौसम सामान्य रहने अनुमान गरिएको छ। कोशी, गण्डकी र कर्णाली प्रदेशका पहाडी क्षेत्रमा आंशिक बदली रहने सम्भावना छ।

आगामी २४ घण्टाको पूर्वानुमान अनुसार कोशी र गण्डकी प्रदेशका उच्च पहाडी तथा हिमाली क्षेत्रमा हल्का हिमपातको सम्भावना छ। साथै, विभागले शुक्रबार बिहान तराईका धेरै स्थानमा घना हुस्सु लाग्ने चेतावनी दिएको छ। यसले दैनिक जनजीवन, कृषि, स्वास्थ्य, यातायात तथा हवाई उड्डयनमा असर पार्न सक्ने भएकाले सतर्कता अपनाउन अनुरोध गरिएको छ।