दमौली ।

पहाडकी रानी’ उपनामले परिचित बन्दीपुर बजारको ऐतिहासिक मौलिकता र सौन्दर्य जोगाइ राख्न स्थानीय तहले कडाइ गर्न थालेको छ। विकास गतिविधि, सार्वजनिक तथा निजी संरचना निर्माण बढ्दै जाँदा बजारको ऐतिहासिक पहिचानलाई कायम राख्नु सबैको दायित्व रहेको बन्दीपुर गाउँपालिकाका अध्यक्ष सुरेन्द्रबहादुर थापाले बताएका छन्।

अध्यक्ष थापाका अनुसार बजारको सौन्दर्य जोगाउन सार्वजनिक गल्ली (करिडोर) खुला राख्न र व्यापारिक भवन तथा पसल अगाडि सामान नराख्न आग्रह गरिएको छ। ‘व्यवसायीले पसल अगाडिको सार्वजनिक क्षेत्रमै कारोबार गर्ने, टेबल, कुर्सी राख्ने समस्या छ। त्यसैले अधिकतम एउटा टेबल र तीनवटा कुर्सी मात्र राख्न पाउने व्यवस्था गरिएको छ,’ उनले भने, ‘व्यवसायीहरूलाई पसल बाहिर सामान नराख्न, ग्राहकले देख्ने गरी मूल्यसूची अनिवार्य राख्नुपर्ने नियम लागू गरिएको छ। साथै, व्यापारिक प्रयोजनका लागि प्रयोग गरिएका ‘फ्लेक्स बोर्ड’ हटाएर काठ वा हस्तलिखित बोर्डहरू अनिवार्य राख्नुपर्ने निर्णय भएको छ।’

बजार क्षेत्रबाहिर टेबल-कुर्सीमा मदिरा सेवन तथा धुम्रपान गर्न प्रतिबन्ध लगाइएको छ। यस निर्णयलाई कार्यान्वयन गर्न अध्यक्ष, उपाध्यक्ष, राजस्व प्रमुख दिनेश पौडेल, राजनीतिक दलका प्रतिनिधिहरू, प्रहरी तथा पत्रकारहरूको टोलीले संयुक्त रूपमा बजार अनुगमन सुरु गरेको छ। हालै भएको अनुगमनका क्रममा व्यवसायीहरूलाई नियम पालना गर्न आग्रह गरिनुका साथै उल्लङ्घन गरेमा कानुनी कारबाही गरिने चेतावनीसमेत दिइएको छ।

नियम उल्लङ्घन गर्ने व्यवसायीलाई रु पाँच हजारसम्म जरिवाना गरिने निर्णय गरिएको अध्यक्ष थापाले जानकारी दिए। भक्तपुरे शैलीमा निर्माण गरिएका घरहरू, टुँडिखेल, थानीमाई, तीनधारा, रानीबन, रामकोट, सुनखरी, खड्देवी मन्दिर, विन्ध्यवासिनी मन्दिर, महालक्ष्मी मन्दिर, सूचना केन्द्रलगायतका स्थलहरू यहाँ आउने पर्यटकहरूका लागि प्रमुख आकर्षण बनेका छन्।

सदरमुकाम दमौलीदेखि १८ किलोमिटर डुम्रे हुँदै आठ किलोमिटरको उकालो यात्रा गरेपछि बन्दीपुर पुगिन्छ। यहाँबाट अन्नपूर्ण, माछापुच्छ्रे, धौलागिरिलगायत हिमशृङ्खला तथा पहाडहरूको मनोरम दृश्य अवलोकन गर्न सकिन्छ, जसले पर्यटकहरूलाई आकर्षित गर्दै आएको छ।