खोटाङ ।

हलेसी तुवाचुङ नगरपालिका–७ स्थित ऐतिहासिक स्थल तुवाचुङ–जायजुममा निर्माण गरिएको पदमार्ग ‘तुवाचुङ मिनी ग्रेटवाल’ पर्यटकका लागि आकर्षणको केन्द्र बनेको छ। ७३० मिटर लामो यो पदमार्ग निर्माणमा सिमेन्टको कङ्क्रिट प्रयोग नगरि चुनासुकीको पर्खाल बनाइएको छ।

संस्कृति, पर्यटन तथा नागरिक उड्डयन मन्त्रालयको लगानीमा बनेको मिनी ग्रेटवालबाट सूर्योदय, सूर्यास्त, सगरमाथा र हिमाली शृङ्खलाको मनोरम दृश्यावलोकन गर्न सकिन्छ। किरात समुदायको सभ्यताको उद्गमस्थल मानिने यस क्षेत्रमा मञ्जुश्री गुफा पदमार्ग, बसाहागुफा अगाडि माङ्खिम घर निर्माणका लागि संघीय सरकारको रु ५ करोड ८२ लाख बजेट विनियोजन गरिएको छ।

नगरपालिकाका अनुसार रैछाकुले, तायामा र खियामाको पूर्णकदको प्रतिमा यसअघि नै स्थापना गरिएको छ। साथै, रु ६० लाखको लागतमा दुईतले पार्किङ स्थल निर्माण भइरहेको छ। तुवाचुङ मिनी ग्रेटवालले ऐतिहासिक महत्वको यस क्षेत्रलाई थप आकर्षक बनाएको छ।