जनयुद्ध दिवसको अवसरमा नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’ले नेपाली जनताको ऐतिहासिक संघर्षको दिनका रूपमा यसलाई स्मरण गरेका छन्। उनले वर्तमान पुस्तालाई जनयुद्धको आवश्यकताबारे प्रश्न उठ्न सक्ने बताए। ‘जनयुद्ध नभएको भए हामी कहाँ हुन्थ्यौं भन्ने कुरा बुझ्नु जरुरी छ,’ उनले भने।

उनको भनाइमा, जनयुद्ध दमनविरुद्धको प्रतिरोधका रूपमा आएको थियो। ‘जनताले यो स्तरको प्रतिरोध नगरेको भए हामी अहिले पनि सामन्ती शोषणमै हुने थियौं। राजनीतिक अधिकारदेखि समाजमा चेतनाको विकास हुने थिएन,’ प्रचण्डले दाबी गरे। उनले जनयुद्धलाई आधुनिक नेपाली राजनीतिका एक महान् परिघटनाका रूपमा चित्रण गरे।

जनयुद्ध दिवस मनाउन भन्दै माओवादीले जितेका विभिन्न स्थानीय तहले आज सार्वजनिक बिदा दिएका छन्। तर, सर्वोच्च अदालतको आदेशविपरीत बिदा दिइएको भन्दै अन्य दलहरूले विरोध जनाएका छन्।

२०७९ माघ २९ गते बसेको तत्कालीन प्रचण्ड नेतृत्वको मन्त्रिपरिषद्ले हरेक वर्ष फागुन १ गते ‘जनयुद्ध दिवस’ मनाउने निर्णय गर्दै सार्वजनिक बिदा घोषणा गरेको थियो। तर, २०८० पुस १३ गते सर्वोच्च अदालतले सरकारको निर्णयलाई बदर गरिदिएको थियो। त्यसैले आज स्थानीय तहमा दिइएको बिदालाई लिएर कानुनी र राजनीतिक रूपमा बहस चर्किएको छ।