प्युठान
नेपाली कांग्रेसका महामन्त्री गगन थापाले नेकपा एमालेसँगको सत्ता साझेदारीमा कांग्रेस इमान्दार रहेको बताएका छन्। उनले २०८४ सालसम्म कांग्रेस–एमाले गठबन्धन कायम रहने दाबी गरेका छन्।
नेपाली कांग्रेसले सोमबार प्युठानमा आयोजना गरेको कार्यक्रममा बोल्दै थापाले आगामी आमनिर्वाचनसम्म कांग्रेस र एमाले मिलेर जाने बताएका हुन्। उनका अनुसार, तीन वर्षभित्र ठोस परिणाम दिने उद्देश्यले एमालेसँग सत्ता साझेदारी गरिएको हो।
“२०७९ सालको चुनावअघि हामीले पाँचदलीय गठबन्धन बनाएका थियौं, तर सहमति तोडेर प्रचण्ड कांग्रेस छाडेर एमालेसँग मिल्नुभयो। हामी प्रचण्डजस्तो होइनौं, सत्ता साझेदारीमा इमान्दार रहन्छौं र कुनै उपद्रो गरेर अर्कोतिर जाँदैनौं,” थापाले भने।
महामन्त्री थापाले एमालेसँग सत्ता साझेदारी गर्दा कांग्रेसका निश्चित सर्त रहने बताए। “कानूनको शासनमा सम्झौता हुँदैन, जनताको अधिकारमा सम्झौता हुँदैन। यी मूल सिद्धान्तहरू कांग्रेसको पहिचान हुन्,” उनले भने।
थापाका अनुसार, केन्द्रदेखि प्रदेशसम्म सहअस्तित्वका आधारमा कांग्रेस–एमाले सहकार्य गर्नेछन्। “न हामी एमालेलाई हेप्छौं, न हामी हेपिन्छौं। जिल्लादेखि केन्द्रसम्म यही व्यवहार हुनुपर्छ। दुर्व्यवहार सहेर कांग्रेस बस्दैन,” उनले थपे।
बीपी कोइरालाले १८ महिनामा गरेका उल्लेखनीय कामहरू स्मरण गर्दै थापाले आगामी ३६ महिनामा ठोस नतिजा दिनेगरी कांग्रेस–एमालेले काम गर्नुपर्ने बताए। “०८४ सालको चुनावमा कांग्रेस घोषणापत्र मात्र लिएर जान पाउँदैन, रिपोर्ट कार्डसहित जनतासामु जानुपर्छ,” उनले जोड दिए।
