काठमाडौँ ।
नेपालका विभिन्न सात जिल्लामा भएका आगलागीका घटनामा लाखौँको क्षति भएको छ। प्रहरीका अनुसार काठमाडौँ, ताप्लेजुङ, बारा, सिराहा, ललितपुर, मुगु र इलाममा भएका घटनामा ठूलो धनमाल नष्ट भएको छ।
काठमाडौँ बुढानीलकण्ठ नगरपालिका–८ स्थित रेसम रायमाझीको घरमा डेरा गरी बस्ने रुकुम पूर्वका लोकराज घिमिरेको कोठामा करेन्ट सर्ट भई आगलागी हुँदा करिब ९ लाख ९९ हजार रुपैयाँ बराबरको धनमाल नष्ट भएको छ।
ताप्लेजुङ आठराई त्रिवेणी गाउँपालिका–३ कान्छी चोकमा इन्द्रबहादुर निरौलाको घरमा विद्युत् सर्ट भई आगलागी हुँदा करिब ८ लाख रुपैयाँ बराबरको धनमाल नष्ट भएको छ।
बारा सुवर्ण गाउँपालिका–३ बख्तौरास्थित घुरमा लागेको आगो फैलिएर धर्मराज सहनीसहित ४ जनाको ४ वटा घर जलेर करिब ४ लाख ७० हजार रुपैयाँ बराबरको क्षति भएको छ।
सिराहा: गोलबजार नगरपालिका–४ स्थित मिनी मार्केटमा नईम मन्सुरीको रेडिमेड कपडा पसलमा आगलागी हुँदा करिब २० लाख रुपैयाँ बराबरको धनमाल नष्ट भएको छ। साथै छेदि साह तेलीको माही इलेक्ट्रोनिक पसलमा पनि आगलागीबाट करिब ३ लाख रुपैयाँको क्षति भएको छ।
ललितपु महालक्ष्मी नगरपालिका–३ टिकाथली करिडोरमा हिरा प्रधानको प्रधान अटो पार्ट इन वर्कसपमा आगलागी भए पनि क्षतिको विवरण खुल्न सकेको छैन।
मुगु छायानाथ रारा नगरपालिका–९ बस्ने गोपाल बमको डाँफे होटेलमा आगलागी हुँदा होटल पूर्ण रूपमा जलेर नष्ट भएको छ। क्षतिको विवरण खुलेको छैन।
इलाम नगरपालिका–९ माईखोलामा गोपाल पाठकले सञ्चालन गरेको भगवती माता टायर रिसोलिङ सेन्टरमा करेन्ट सर्ट भई आगलागी हुँदा घर र मेसिन आंशिक रूपमा क्षति भएको छ।
सबै घटनाका बारेमा प्रहरीले अनुसन्धान भइरहेको जनाएको छ।
