अपाङ्गता भएका व्यक्तिहरूले विभिन्न खेलकुद मध्ये ह्विलचियर बास्केटबल पनि खेल्दै आएका छन् । नेपालमा ह्विलचियर बास्केटबल खेलको सुरुवात वि.स.२०६६ साल देखि नेपाल स्पाइनल कर्ड इन्जुरी खेलकुद संघले गरेको हो । यस संस्थाले विभिन्न समयमा उपत्यका स्तरीय तथा राष्ट्रिय स्तरमा पनि ह्विलचियर बास्केटबल प्रतियोगिताको आयोजना गर्दै आएको छ ।

यसै क्रममा नेपाल स्पाइनल कर्ड इन्जुरी खेलकुद संघले बाग्मती प्रदेश सरकार युवा तथा खेलकुद मन्त्रालय, राष्ट्रिय खेलकुद परिषद्, नेपाल बास्केटबल संघको सहकार्यमा यही चैत ४ र ५ गते अन्तर उपत्यका क्लब स्तरीय ह्विलचियर बास्केटबल प्रतियोगिताको आयोजना गर्दै छ । उक्त प्रतियोगिता त्रिपुरेश्वर स्थित राष्ट्रिय खेलकुद परिषद् (राखेप) कभर्ड हलमा दुई दिन सम्म हुने उक्त प्रतियोगितामा पुरुष तर्फ ७ र महिला तर्फ ६ गरी १३ समूह सहभागी हुने नेपाल स्पाइनल कर्ड इन्जुरी खेलकुद संघले शनिवार अर्थात् चैत २ गते जोरपाटी स्थित कार्यालयमा गरिएको पत्रकार सम्मेलनमा संस्थाकी अध्यक्ष देवी आचार्यले जानकारी गराउनु भयो ।

साथै उहाँले खेलकुद स्वास्थ्यको लागि अति उपयोगी हुने र खेलको माध्यम मार्फत नै व्यक्तित्व विकास गर्न सकिने, सामाजिकीकरण हुने, आत्मविश्वास बढ्ने, सामाजिक तथा पारिवारिक जनचेतनामा सकारात्मक परिवर्तन ल्याउन महत्त्वपूर्ण भूमिका निर्वाह गर्ने हुनाले विभिन्न समयमा ह्विलचियर बास्केटबल प्रतियोगिताको आयोजना गर्ने गरेको बताउनु भयो । शनिवार चैत २ गते आयोजित पत्रकार सम्मेलनमा प्रस्तुत गरिएको प्रेस विज्ञयप्तीका अनुसार चैत ४ र ५ गते हुने अन्तर उपत्यका क्लब स्तरीय ह्विलचियर बास्केटबल प्रतियोगितामा सहभागी समूहलाई २ समूहमा विभाजन गरिएको छ बताइएको छ ।

प्रतियोगिताका टेक्निकल हेड तथा कमिस्नर प्रेम सुन्दर होनाका अनुसार पुरुषतर्फ समूह ‘ए’ मा दुई विभागीय टोली एपिएफ र आर्मी सहित स्पाइनल कर्ड इन्जुरी नेटवर्क नेपाल र ह्विलचियर स्पोर्टस् एसोसिएसन सहभागी हुनेछन्। त्यसै गरी अर्को समूहमा बिआइए, नेपाल आदिवासी जनजाति अपाङ्ग संघ र आयोजक समूह नेपाल स्पाइनल कर्ड इन्जुरी खेलकुद संघ रहेका छन् । महिला समूह तर्फ भने समूह ‘ए’ मा एससिआइएनएन, राष्ट्रिय आदिवासी अपाङ्ग महिला संघ नेपाल (नीडवान्) र आयोजक समूह नेपाल स्पाइनल कर्ड इन्जुरी खेलकुद संघ रहने छन् । अर्को समूहमा जावलाखेल ह्विलचियर स्पोर्ट क्लब (जिडब्युएससी), डब्ल्युएसए र बिआइए रहने छन्।

लिग कम नकआउट आधारमा हुने प्रतियोगिताको पहिलो दिन १५ खेल हुने छन् भने यी सबै लिग चरणका खेल सकिएसँगै दोस्रो दिन अर्थात् चैत ५ गते सेमिफाइनल, फाइनल, तेस्रो र चौथो स्थानका लागि प्रतिस्पर्धा हुने टेक्निकल हेड तथा कमिस्नर प्रेम सुन्दर होनाले जानकारी दिनु भयो । उक्त प्रतियोगितामा हरेक समूहका शीर्ष दुई टोली सेमिफाइनल प्रवेश गर्ने छन् भने प्रतियोगिताको पहिलो खेलमा पुरुष तर्फ एपिएफ र एससिआइएनएन भिड्ने छन् । त्यसै गरी महिला तर्फ जावलाखेलले डब्ल्युएसएलाई चुनौती प्रस्तुत गर्ने छन् ।

अन्तर उपत्यका क्लब स्तरीय ह्विलचियर बास्केटबल प्रतियोगितामा महिला र पुरुष दुवै टिमको प्रथम हुने समूहले रु ५० /५० हजार, दोस्रो हुने समूहले रु ४० / ४० हजार र तृतीय हुने समूहले रु ३० / ३० हजार नगद पुरस्कार प्राप्त गर्ने, प्रतियोगिताको हाइ स्कोर र सर्वोत्कृष्ट खेलाडीले ३ / ३ हजार रुपैयाँ प्राप्त गर्ने कुरा उक्त प्रेस विज्ञयप्तीमा जनाइएको छ ।