काठमाडौं।

नेपाल उद्योग वाणिज्य महासंघका अध्यक्ष चन्द्रप्रसाद ढकालले नागरिक लगानी कोष, सञ्चय कोष लगायतका कोषहरूको लगानी उत्पादनमूलक क्षेत्र र रोजगारी बढाउने क्षेत्रमा प्रयोग गर्नुपर्ने बताएका छन्।

सोमबार काठमाडौंमा नागरिक लगानी कोषको ३५ औं वार्षिकोत्सव कार्यक्रममा बोल्दै उनले कोषको ध्यान उक्त कार्यतर्फ जानुपर्ने बताएका हुन्।

अध्यक्ष ढकालले नागरिक लगानी कोष, सञ्चय कोष, सामाजिक सुरक्षा कोष लगायतका कोषहरूको लगानी पूर्वाधार निर्माण, रोजगारी सिर्जना, पर्यटन प्रवर्द्धन, हाइड्रोपावर लगायतका क्षेत्रमा उपयोग गर्नुपर्ने बताए।

उनका अनुसार कोषहरूको करिब ५२ प्रतिशतभन्दा बढी रकम बैंक तथा वित्तीय संस्थाहरूमा फिक्स डिपोजिटको रूपमा रहेको छ। उनले उक्त रकम रोजगारी सिर्जना र विकास निर्माणमा लगानी गर्नुपर्ने बताए।

ढकालले नागरिक लगानी कोष, सञ्चय कोष, सामाजिक सुरक्षा कोष लगायतका कोषहरूमा करिब दुई खर्ब ७० अर्ब हाराहारीको फण्ड रहेको जानकारी गराउँदै एसएसएफमा मात्रै करिब एक खर्ब रहेको बताए। उनले उक्त फण्डलाई उत्पादनमूलक क्षेत्रमा परिचालन गर्नुपर्ने आवश्यकता औंल्याए।

उनले थपे, ‘एउटा मेरिट बेसिसमा सर्टेन प्रतिशत पूर्वाधार निर्माण, रोजगारी सिर्जना, पर्यटन प्रवर्द्धन, हाइड्रोपावर लगायतका क्षेत्रमा सरकार मातहतका कम्पनीहरूमा लगानी भइसकेको छ। निजी क्षेत्रका परियोजनामा पनि लगानी गर्नुपर्छ।’

अध्यक्ष ढकालले जम्मा भएका फण्डहरू विकास निर्माण, उत्पादनशील क्षेत्र र रोजगारी सिर्जना गर्ने क्षेत्रमा लगानी गर्नेगरी अघि बढ्नुपर्ने सुझाव दिए।