किसानका समस्या समाधान गर्न गठित राष्ट्रिय किसान आयोग किसानको हितमा प्रभावकारी रूपमा काम गर्नुपर्ने माग किसानहरूले गरेका छन्। किसान सूचीकरण कार्यक्रम प्रभावकारी कार्यान्वयनका सम्बन्धमा आयोगले बुधबार आयोजना गरेको छलफलमा सहभागी किसानहरूले आयोगलाई सहज रूपमा कार्यसम्पादन गर्ने वातावरण बनाउन आग्रह गरे।
छलफलमा नेपाल किसान महासङ्घ बागमती प्रदेशकी उपाध्यक्ष प्रतिभा पाण्डेले किसानका उत्पादनलाई उचित मूल्य दिलाउन आयोगले सक्रिय भूमिका खेल्नुपर्नेमा जोड दिइन्। केन्द्रीय दुग्ध उत्पादक सहकारी सङ्घका उपाध्यक्ष भगिरथ तिमिल्सिनाले किसानका समस्या समाधानमा आयोगले अपेक्षित ध्यान नदिएको गुनासो गरे।
केरा उत्पादक किसान जनकराज पन्तले किसान सूचीकरणका लागि स्थानीय तहलाई अधिकार सम्पन्न बनाउनुपर्ने माग गरे। कृषि तथा पशुपक्षी विकास मन्त्रालयका उपसचिव चेतबहादुर रोकाका अनुसार हालसम्म २० लाख ७१ हजार १०६ किसानले सूचीकरणका लागि आवेदन दिएका छन्, जसमध्ये बागमती प्रदेशका किसान ३ लाख २९ हजार ८७६ छन्।
देवचुली नगरपालिकाका प्रमुख हरिप्रसाद पोखरेलले किसानका समस्याप्रति आयोग संवेदनशील हुनुपर्ने बताए। मकवानपुर जिल्ला समन्वय समिति प्रमुख ललित घलानले किसानका समस्या समाधानका लागि आयोगको भूमिका महत्वपूर्ण हुने बताए।
छलफलका क्रममा राष्ट्रिय किसान आयोगका अध्यक्ष प्रेमप्रसाद दङ्गालले किसानका समस्या समाधानका लागि आयोगले सरकारलाई आवश्यक सुझाव प्रदान गरिरहेको जानकारी दिए।
