काठमाडौं ।

काठमाडौंको तीनकुनेमा शुक्रबार भएको प्रदर्शन, तोडफोड र आगजनीमा संलग्न भएको आरोपमा पक्राउ परेका राजावादी नेता तथा कार्यकर्ताहरूको म्याद आज आइतबार थप गरिँदै छ।

शुक्रबार राति पक्राउ परेका उनीहरूको अनुसन्धानका लागि शनिबार अदालतमा पेश गर्न नसकिएकाले आज म्याद थप गरिने जिल्ला प्रहरी परिसर, काठमाडौंका प्रवक्ता एसपी अपिलराज बोहराले जानकारी दिए।

हिंसात्मक प्रदर्शनका क्रममा ११२ जना पक्राउ परेका छन्। पक्राउ पर्नेहरूमा राप्रपाका वरिष्ठ उपाध्यक्ष रविन्द्र मिश्र, महामन्त्री धवल शम्शेर राणा, राजावादी अभियन्ता स्वागत नेपाल, दुर्गा प्रसाईंको रोयल टास्क फोर्स (आरटीएफ)का कमाण्डरलगायत छन्।

यसैबीच, राजतन्त्र पुनर्स्थापनाका लागि आन्दोलन गरिरहेको समितिका संयोजक नवराज सुवेदीलाई घरमै नजरबन्द गरिएको छ भने आन्दोलन भड्काउने मुख्य व्यक्ति दुर्गा प्रसाईं फरार रहेको प्रहरीले जनाएको छ।

पक्राउ परेकाहरूबाट स्क्रिनिङ गरेर आवश्यक अनुसन्धान गरिने र कसलाई कुन मुद्दा लगाउने भन्ने टुंगो लगाइने बताइएको छ। प्रहरीले अमानवीय, अमर्यादित तथा गैरकानुनी गतिविधिमा संलग्न भएकाहरूलाई नियन्त्रणमा लिएको जनाएको छ।

१५ गते भएको राजावादी आन्दोलनको क्रममा एक जना पत्रकारसहित दुई जनाको मृत्यु भएको थियो।