काठमाडौँ ।

 काठमाडौं महानगरपालिकाले पूर्व राजा ज्ञानेन्द्र शाहलाई जरिवाना पत्र बुझाउन वैकल्पिक प्रक्रिया अपनाउने भएको छ। आइतबार बिहान महानगरको टोली निर्मल निवास पुगे पनि प्रहरीले गेटबाटै फर्काएपछि महानगरले हुलाक लगायत अन्य माध्यमबाट पत्र पठाउने निर्णय गरेको हो।

काठमाडौं महानगर प्रहरी बलका प्रमुख राजु पाण्डेका अनुसार निर्मल निवासले पत्र स्वीकार नगरेपछि महानगरले वैकल्पिक विधिबाट पत्र पठाउने तयारी गरेको छ। “हुलाक लगायत अन्य प्रक्रियाबाट पत्र बुझाउँछौं,” उनले भने।

चैत १५ गते तीनकुने–कोटेश्वर क्षेत्रमा राजावादीहरूले आयोजना गरेको प्रदर्शनका क्रममा सार्वजनिक सम्पत्तिलाई क्षति पुगेको भन्दै काठमाडौं महानगरपालिकाले क्षतिपूर्ति स्वरूप ७ लाख ९३ हजार रुपैयाँ जरिवाना तोकेको थियो। यसै निर्णयअनुसार पूर्व राजा शाहलाई जरिवाना सम्बन्धी पत्र पठाउने प्रक्रिया अघि बढाइएको हो।