काठमाडौं ।
सभामुख देवराज घिमिरेले प्रमुख राजनीतिक दलका प्रमुख सचेतकहरूसँग संसद् सञ्चालनबारे छलफल गरिरहेका छन्। नयाँ बानेश्वरस्थित संसद् भवनको सभामुख च्याम्बरमा भइरहेको छलफलमा नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राप्रपा लगायतका दलका प्रमुख सचेतकहरू सहभागी छन्।
प्रतिनिधि सभाको बैठक आइतबार बिहान ११ बजेका लागि बोलाइएको थियो, तर विपक्षी दलको अवरोधका कारण पछिल्ला दुई बैठक सञ्चालन हुन सकेका थिए। यसै कारण, सभामुख घिमिरेले प्रमुख सचेतकहरूसँग संवाद गरेर संसद् अघि बढाउने पहल गरेका हुन्।
संघीय संसद् सचिवालयका अनुसार आइतबारको बैठकका लागि विभिन्न विधेयकहरू कार्यसूचीमा समावेश छन्। जसअनुसार:
-
बैंकिङ कसूर तथा सजाय (दोस्रो संशोधन) विधेयक, २०८० राष्ट्रिय सभाबाट प्राप्त सन्देशसहित टेबुल गरिनेछ।
-
जलस्रोत विधेयक सम्बन्धी समितिको प्रतिवेदन, २०८१ पूर्वाधार विकास समितिका सभापति दीपक बहादुर सिंहले पेस गर्नेछन्।
-
मानव बेचबिखन तथा ओसारपसार नियन्त्रण (पहिलो संशोधन) विधेयक, २०८१ महिला, बालबालिका तथा ज्येष्ठ नागरिक मन्त्री नवलकिशोर साह सुडीले प्रस्तुत गर्नेछन्।
-
नेपाल कानून व्यवसायी परिषद (दोस्रो संशोधन) विधेयक, २०८१ माथि विचार गरियोस् भन्ने प्रस्ताव कानून, न्याय तथा संसदीय मामिला मन्त्री अजय कुमार चौरसियाले प्रस्तुत गर्नेछन्।
विपक्षी दलको अवरोधका कारण संसद् सञ्चालनमा अवरोध आइरहेकाले सभामुखको यो छलफलबाट प्रतिनिधि सभा बैठक सहज रूपमा सञ्चालन हुने आशा गरिएको छ।
