काठमाडौँ ।

सभामुख देवराज घिमिरेले संसदको गतिरोध अन्त्य गर्न प्रमुख दलका प्रमुख सचेतकहरूसँग छलफल गरिरहेका छन्। नेपाल विद्युत प्राधिकरणका कार्यकारी निर्देशक कुलमान घिसिङको बर्खास्तीबारे प्रश्न उठाउँदै विपक्षी दलहरूले संसद अवरुद्ध पार्दै आएका छन्। उनीहरूले यस विषयमा प्रधानमन्त्री केपी शर्मा ओली स्वयंले स्पष्ट जवाफ दिनुपर्ने अडान राखेका छन्।

प्रधानमन्त्री ओलीले सोमबार संसदलाई सम्बोधन गर्ने तयारी गरेका छन्। तर, विपक्षी दलहरूले “प्रधानमन्त्रीको जवाफ नसुनेसम्म सदन सञ्चालन हुन नदिने” अडान लिएका छन्।

आइतबार बिहान ११ बजेका लागि प्रतिनिधि सभा बैठक बोलाइएको थियो। तर, संसद सहज रूपमा सञ्चालन हुने वातावरण नदेखिएपछि सभामुख घिमिरेले प्रमुख राजनीतिक दलका प्रमुख सचेतकहरूसँग संवाद गरिरहेका छन्। संसद गतिरोध अन्त्यका लागि सभामुखको प्रयास जारी रहे पनि विपक्षी दलहरू आफ्नै अडानमा कायमै छन्, जसले गर्दा संसद सञ्चालनमा अन्योल कायमै छ।