संसद गतिरोध अन्त्य गर्न प्रधानमन्त्री केपी शर्मा ओलीले सर्वदलीय बैठक बोलाएका छन्।
सभामुख देवराज घिमिरेसँग आइतबार बिहान बसेको छलफलमा एमालेका मुख्य सचेतक महेश बर्तौलाले प्रधानमन्त्री ओलीले सर्वदलीय बैठक बोलाएको जानकारी गराएका हुन्।
पछिल्लो समय नेपाल विद्युत प्राधिकरणका कार्यकारी निर्देशक कुलमान घिसिङको बर्खास्तीबारे विपक्षी दलहरूले प्रश्न उठाउँदै आएका छन्। उनीहरूले यो विषयमा प्रधानमन्त्री ओली स्वयंले स्पष्ट जवाफ दिनुपर्ने माग राख्दै संसद अवरुद्ध गर्दै आएका छन्।
संसद सञ्चालनमा देखिएको अवरोध हटाउन र सर्वसम्मत समाधान खोज्न प्रधानमन्त्री ओलीले सर्वदलीय बैठक बोलाएका हुन्। अब यो बैठकले संसद गतिरोध अन्त्य गर्ने मार्ग प्रशस्त गर्ने अपेक्षा गरिएको छ।
