काठमाडौं ।
प्रतिनिधिसभा बैठक पुनः स्थगित भएको छ। संसद् सचिवालयले तेस्रो पटक सूचना जारी गर्दै बैठकको समय फेरि परिवर्तन गरेको जानकारी दिएको छ।
प्रतिनिधिसभा नियमावलीअनुसार, निर्धारित समयभन्दा दुई घण्टा ढिलो भए बैठक स्वतः स्थगित हुने प्रावधान छ।
यही व्यवस्थाका कारण संघीय संसद्का महासचिव पद्मप्रसाद पाण्डेयले निर्धारित समयभन्दा अगावै सूचना जारी गरी बैठक आज दिउँसो ४ बजे बस्ने गरी सारिएको जानकारी गराएका छन्।
यसअघि आज बिहान ११ बजेका लागि बोलाइएको बैठक सत्ता र प्रतिपक्षी दलहरूबीच सहमति जुट्न नसक्दा बस्न सकेन। त्यसपछि बैठकलाई दिउँसो १:१५ बजेका लागि सारिएको थियो। तर, उक्त बैठकमा पनि सत्ता पक्ष र प्रतिपक्षबीच विवाद उत्पन्न भएपछि बैठक पुनः स्थगित गर्नुपर्यो।
बदलिएको परिस्थितिलाई मध्यनजर गर्दै, बैठकलाई १५ मिनेटका लागि स्थगित गरिएको थियो। त्यसपछि दिउँसो ३:३० बजेका लागि पुनः सूचना जारी गर्दै बैठक सारिएको थियो। तर, अन्ततः महासचिव पाण्डेयको नयाँ सूचनासँगै बैठक आजै दिउँसो ४ बजे बस्नेगरी तेस्रो पटक सारिएको छ।
