काठमाडौँ ।
नेकपा एमालेका प्रमुख सचेतक महेश बर्तौलाले निरन्तर संसद् अवरुद्ध गर्ने कार्यले प्रमुख प्रतिपक्षीको राजनीतिक दृष्टिकोणप्रति नै प्रश्न उठाएको बताएका छन्।
आइतबार संसद् भवनमा सञ्चारकर्मीहरूसँग कुरा गर्दै बर्तौलाले बाहिर गणतन्त्रको पक्षमा नाराबाजी गर्ने तर सदनभित्र गणतन्त्रविरोधी समूहहरूसँग मिलेर संसद् चल्न नदिने माओवादीको भूमिकाले प्रश्न उठाएको बताए।
उनका अनुसार, मुलुकमा देखिएका गम्भीर मुद्दाहरूमा सदनभित्र विस्तृत छलफल गरी पूर्वराजा ज्ञानेन्द्र शाहलाई कानुनी दायरामा ल्याउनुपर्ने बेला माओवादीका कारण अवरोध सिर्जना भइरहेको छ।
बर्तौलाले एक कर्मचारीसम्बन्धी प्रश्नमा प्रधानमन्त्री जवाफ दिन तयार भए तापनि माओवादीले सदन अवरुद्ध गर्दै प्रतिस्थापन विधेयक पारित नगर्ने रणनीति लिएको आरोप लगाए।
उनले शुक्रबारको घटनाका मुख्य दोषी पूर्वराजा ज्ञानेन्द्र शाह भएको दाबी गर्दै कानुनी प्रक्रियाअनुसार कारबाही गर्नुपर्ने स्पष्ट पारे। साथै, पूर्वराजालाई दिइएको सबै सेवा सुविधा फिर्ता लिनुपर्ने उनले जोड दिए।
