काठमाडौं ।

मानवअधिकार तथा शान्ति समाजले शुक्रबार तीनकुनेमा भएको घटनाका दोषीलाई कारबाहीको दायरामा ल्याउन माग गरेको छ।

समाजका संस्थापक सभापति कृष्ण पहाडी र सभापति रेनुका पौडेलले राजधानीमा आयोजित कार्यक्रममा पूर्वराजा समर्थित प्रदर्शनकारीद्वारा मच्चाइएको लुटपाट, तोडफोड र आगजनीको निन्दा गर्दै दोषीहरूलाई कानुनी कारबाही गर्न आग्रह गरेका छन्।

संविधान जारी भएको एक दशक पुग्न लागेको सन्दर्भमा संविधानका कमजोरीबारे पुनरावलोकन स्वाभाविक प्रक्रिया भएको बताउँदै पहाडीले आगामी संशोधनमा जीवनचक्र परिस्थिति सन्तुलन र अहिंसात्मक जीवनधारालाई प्रस्तावनामा समावेश गर्नुपर्नेमा जोड दिए।

नागरिक सर्वोच्चता र स्वतन्त्रता नै लोकतन्त्रको आधार भएको उल्लेख गर्दै उनले नेपालमा अब राजतन्त्रको पुनःस्थापना असम्भव रहेको र त्यसको माग गर्नु सभ्यता तथा स्वतन्त्रताविरोधी कार्य भएको बताए।

यसै अवसरमा समाजले जलवायु न्याय केन्द्रित विशेष अभियानअन्तर्गत राजधानीमा ‘जलवायु संवाद कार्यक्रम’ सम्पन्न गरेको छ। कार्यक्रममा वन तथा वातावरण मन्त्रालयका पूर्वसचिव तथा जैविक विविधता तथा पारिस्थितिकीय प्रणालीसम्बन्धी अन्तरसरकारी मञ्चका उपाध्यक्ष डा. विश्वनाथ ओली, जलवायु तथा प्राकृतिक स्रोत व्यवस्थापन विज्ञ सन्तोषमणि नेपाल, नीति, कानून तथा योजनाविद् प्रताप पौडेल, समाजका सल्लाहकार तथा पूर्वसभापति रामकृष्ण बराल, पूर्वसभापतिहरू होमकान्त चौलागाईँ र डा. गङ्गाधर अधिकारीलगायतले जलवायु परिवर्तनजस्ता महत्त्वपूर्ण विषयमा सबै दलको ध्यान जानुपर्नेमा जोड दिएका थिए।

समाजका उपनिर्देशक सरिता पौडेलका अनुसार विशेष अभियानअन्तर्गत समाजका अछाम, तेह्रथुम, रुपन्देही, सल्यान, चितवन, सुर्खेत, इलामलगायतका शाखाहरूले पनि जलवायु संवाद कार्यक्रम सम्पन्न गरेका छन्।