काठमाडौँ ।

जनता समाजवादी पार्टी (जसपा) नेपालले चैत्र मसान्तसम्म वडा, पालिका र जिल्ला समितिहरूको अधिवेशन सम्पन्न गर्ने भएको छ। पालिका समितिको जिम्मेवारीमा खटाइएका केन्द्रीय अभियन्ताहरूको समन्वयमा स्थानीय तहको अधिवेशन तीव्र गतिमा अघि बढाइएको पार्टीका प्रचार प्रसार तथा प्रकाशन विभाग प्रमुख पूर्ण बस्नेतले जानकारी दिएका छन्।

पार्टीको परिपत्रअनुसार स्थानीय तहको अधिवेशनपश्चात् प्रदेश समिति र पहिचानमा आधारित राष्ट्रिय समितिको अधिवेशन वैशाख २५ गतेभित्र सम्पन्न गरिनेछ। त्यस्तै, वैशाख मसान्तसम्म भ्रातृ सङ्गठनहरूको अधिवेशन सम्पन्न गर्ने निर्णय गरिएको प्रमुख बस्नेतले बताएका छन्।

जसपा नेपालले ‘जनतासँग जसपा नेपाल, आधारभूत सङ्गठन निर्माण अभियान’ अन्तर्गत पार्टी प्रवेश कार्यक्रम, सदस्यता वितरण तथा नवीकरणलगायतका सङ्गठनात्मक गतिविधि तीव्र रूपमा अघि बढाएको छ। पार्टीको यो अभियान २०८२ वैशाख मसान्तसम्म जारी रहने बताइएको छ।