काठमाडौँ ।

 नेकपा माओवादी केन्द्रले स्थगित गरेको तराई-मधेस जागरण अभियान चैत २२ गतेबाट पुनः सुरू गर्ने भएको छ।

सोमबार माओवादी केन्द्रका अध्यक्ष पुष्पकमल दाहाल ‘प्रचण्ड’ निवास, खुमलटारमा बसेको पदाधिकारी बैठकले हुलाकी मार्ग केन्द्रित अभियान सञ्चालन गर्ने निर्णय गरेको हो। बैठकमा अभियानको मोडालिटी परिमार्जन गर्ने विषयमा छलफल भएको सचिव दीनानाथ शर्माले जानकारी दिए।

शर्माका अनुसार अभियान चार दिन लगातार सञ्चालन गरेपछि एक दिन ब्रेक लिइनेछ। यस क्रममा प्रतिगामी षड्यन्त्रविरुद्ध बुद्धिजीवी तथा गणतन्त्र पक्षधरहरूसँग अन्तर्क्रिया गरिनेछ।

बैठकमा मुख्य रूपमा आन्तरिक विषयमा छलफल भएको बताइएको छ। यी विषयलाई थप स्पष्ट बनाउन बैठक भोलि पनि बोलाइएको सचिव शर्माले जानकारी दिएका छन्।