काठमाडौं
प्रधानमन्त्री केपी शर्मा ओली आज (मंगलबार) थाइल्याण्डको औपचारिक भ्रमण तथा बिमस्टेक (बङ्गालको खाडीको प्रयास) को छैटौँ शिखर सम्मेलनमा सहभागी हुन बैंककतर्फ जाँदै छन्।
प्रधानमन्त्री ओली थाइल्याण्डका प्रधानमन्त्री फेथोङथान सिनावात (पैटोङ्टार्न शिनावात्रा) को मैत्रीपूर्ण निमन्त्रणामा थाइल्याण्डको भ्रमणमा जान लागेका हुन्। यो नेपालका कुनै प्रधानमन्त्रीद्वारा इतिहासमै पहिलो औपचारिक भ्रमण हुनेछ।
प्रधानमन्त्रीको सचिवालय र परराष्ट्र मन्त्रालयका अनुसार प्रधानमन्त्री ओली नेतृत्वको भ्रमण टोली दिउँसो १३:३० बजे थाइ एयरलाइन्स बाट बैंककतर्फ प्रस्थान गर्नेछ।
प्रधानमन्त्री ओलीको भ्रमणका क्रममा द्विपक्षीय वार्ता हुनेछ, जसमा पर्यटन र संस्कृतिका क्षेत्र सम्बन्धी दुई सम्झौतासहित छ वटा समझदारीपत्रमा हस्ताक्षर गरिनेछ।
द्विपक्षीय वार्तापछि प्रधानमन्त्री ओली र थाइल्याण्डका प्रधानमन्त्री सिनावात संयुक्त प्रेस ब्रिफिङमा सहभागी हुनेछन्।
थाइल्याण्डका नरेशसँग भेटघाटपछि एकदिने औपचारिक भ्रमण सम्पन्न हुनेछ।
प्रधानमन्त्री ओलीले चैत २१ गते बिहान थाइल्याण्डका प्रतिष्ठित व्यवसायीहरूसँग छलफल गर्नेछन्। दिउँसो एसियन इन्स्टिच्युट अफ टेक्नोलोजी मा आयोजित कार्यक्रममा सम्बोधन गर्ने कार्यक्रम छ। साँझ बिमस्टेक शिखर सम्मेलन मा सहभागी नेताहरूका लागि आयोजित औपचारिक रात्रिभोजमा पनि प्रधानमन्त्री ओलीको उपस्थिति रहनेछ।
चैत २२ गते ओलीले बिमस्टेक शिखर सम्मेलन मा सम्बोधन गर्नेछन्। सम्भव भएमा विभिन्न मुलुकका नेताहरूसँग साइडलाइन वार्ता गर्ने योजना समेत छ। त्यसै दिन मेरिटाइम ट्रान्सपोर्ट कोअपरेशन एग्रिमेन्ट मा हस्ताक्षर समारोहमा पनि उनी सहभागी हुनेछन्। साँझ बैंककस्थित नेपाली दूतावास मा आयोजना हुने कार्यक्रममा पनि प्रधानमन्त्री ओली उपस्थित हुनेछन्।
प्रधानमन्त्री ओलीको भ्रमण टोलीमा उनकी पत्नी राधिका शाक्य, परराष्ट्रमन्त्री डा. आरजु राणा देउवा, मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा. युवराज खतिवडा, मुख्यसचिव एकनारायण अर्याल, परराष्ट्र सचिव अमृतबहादुर राई, निजी चिकित्सक डा. दिव्यासिंह शाह, प्रमुख स्वकीय सचिव राजेश बज्राचार्य, सुरक्षाकर्मी र सञ्चारकर्मी सहित २१ सदस्यीय टोली रहेको छ।
प्रधानमन्त्री ओली नेतृत्वको टोली यही चैत ২৩ गते स्वदेश फर्किनेछ।
