पोर्चुगल ।

पोर्चुगलका लागि नवनियुक्त नेपाली राजदूत प्रकाशमणि पौडेलले राष्ट्रपति मार्सेलो रेबेलो डी सौसासमक्ष आफ्नो ओहोदाको प्रमाणपत्र पेस गरेका छन्।

सोमबार लिस्बनस्थित राष्ट्रपति भवन बेलेम प्यालेसमा आयोजित एक समारोहमा राजदूत पौडेलले औपचारिक रूपमा आफ्नो ओहोदाको प्रमाणपत्र प्रस्तुत गरेका हुन्। प्रमाणपत्र पेस गरेपछि उनले राष्ट्रपति सौसासँग शिष्टाचार भेटवार्ता गरेका थिए।

भेटवार्ताका क्रममा नेपाल–पोर्चुगलबीचको द्विपक्षीय सम्बन्धलाई थप सुदृढ बनाउने, आपसी हितका विषयमा सहकार्य अभिवृद्धि गर्ने तथा व्यापार र पर्यटन प्रवर्द्धनबारे छलफल भएको नेपाली दूतावासले जनाएको छ। साथै, नेपालमा पोर्चुगलको दूतावास स्थापनाको सम्भावनाबारे समेत आग्रह गरिएको थियो।

राष्ट्रपति सौसाले राजदूत पौडेललाई बधाई ज्ञापन गर्दै उनको कार्यकाल सफल रहोस् भन्ने शुभकामना दिएका थिए। उक्त समारोहमा पोर्चुगलका विदेश राज्यमन्त्री/सहायकमन्त्री नुनो साम्पाइओ, विदेश मामिला सचिवालयका महासचिव फ्रान्सिस्को रिबेरो तेलेस, विदेश मन्त्रालयका उच्च अधिकारीहरू, राजदूत पत्नी रुपा पौडेल, दूतावासका द्वितीय सचिव रामबाबु नेपाललगायतको उपस्थिति रहेको थियो।

गत मंसिरमा पोर्चुगलका लागि नेपाली राजदूतमा नियुक्त भएका पौडेल गत फागुन २२ गते पोर्चुगल पुगेका थिए।