काभ्रे ।

गत असोजको दोस्रो सातामा आएको बाढीपहिरोका कारण क्षतिग्रस्त बनेको बिपी राजमार्गमा अहिले वैकल्पिक सडक निर्माणको कार्य तीव्र गतिमा जारी छ। हालका लागि खोलाको बगरैबगर बनाइएको अस्थायी बाटो हुँदै सवारीसाधन सञ्चालन भइरहेका छन्।

काभ्रेपलाञ्चोकको नमोबुद्ध नगरपालिका–५ चौकीडाँडादेखि सिन्धुलीको सिमाना बर्खेखोलासम्म बाढीले करिब आठ किलोमिटर सडक बगाएपछि हाल वैकल्पिक सडक बनाइएको छ। भक्तपुर सडक डिभिजन कार्यालयका अनुसार आउँदो बर्खायामलाई मध्यनजर गर्दै सडकको उचाइ बढाएर सुरक्षित वैकल्पिक सडक निर्माण कार्य भइरहेको छ। चौकीडाँडास्थित क्षतिग्रस्त खण्डमा खोलाको सतहभन्दा माथि उठाएर सडक निर्माण भइरहेको छ।

सडक डिभिजन कार्यालयले दीर्घकालीन पक्की सडक निर्माणका लागि ठेक्का आह्वान गरिसकेको छ। तर, ‘विड ओपनिङ’, मूल्याङ्कन र ठेकेदार फिल्डमा आउने प्रक्रिया बाँकी रहेकोले तत्काललाई वैकल्पिक सडक निर्माण भइरहेको इन्जिनियर दुर्गाप्रसादले जानकारी दिए।

खोलाको उचाइ बढेका कारण अहिले अस्थायी सडक खोलाबगर हुँदै सञ्चालनमा रहेकाले बर्खायाममा समस्या आउन सक्ने देखिएको छ। त्यसैले, खोलाको धार परिवर्तन गर्दै सडकको उचाइ खोला सहतभन्दा माथि उठाएर सुरक्षित रुपमा निर्माण गर्ने काम भइरहेको छ। चौकीडाँडामा तीव्रगतिमा निर्माण कार्य भइरहेको छ भने बोक्सेकुना र चिउरीबास खण्डमा काम सम्पन्न भइसकेको छ। माम्ती, डालाबेँसी, नार्के, गिम्दीबेँसी, चार सयबेँसी र कटुञ्जे घुम्ती खण्डमा अझै काम गर्न बाँकी छ।

भक्तपुर सडक डिभिजनका अनुसार वैकल्पिक सडक निर्माण कार्य सम्पन्न गर्न दुई इन्जिनियर, एक सबइन्जिनियरसहित ३० जना अपरेटर कार्यरत छन्। कार्यालयले आगामी वैशाखभित्र सबै काम सम्पन्न गर्ने लक्ष्य लिएको छ।

यात्रीहरू बर्खायाममा पनि बिपी राजमार्ग सञ्चालन हुने आशामा छन्।