महोत्तरी ।

महोत्तरीमा पछिल्लो पन्ध्र दिनको अवधिमा करिब १३ क्विन्टल गाँजा बरामद गरिएको छ। लागुऔषध नियन्त्रण ब्यूरो बर्दिबासको सक्रियतामा विभिन्न स्थानहरूमा जाँच गर्दा ठूलो परिमाणमा गाँजा फेला परेको हो।सोमबार साँझ बिपी राजमार्ग अन्तर्गत बर्दिबास–३ गौरीडाँडास्थित ट्राफिक प्रहरी पोष्ट अगाडि वागमती प्रदेश–०१–००६–ख ५३७१ नम्बरको ट्रक जाँच गर्दा, ट्रकको हुटमाथि प्लास्टिकमा बेरिएको दुई क्विन्टल ३५ किलो गाँजा बरामद गरिएको थियो।

सोही क्रममा ट्रक चालक मकवानपुरको थाहा नगरपालिका–७ डाँडाबासका २७ वर्षीय कविराज गोलेलाई पक्राउ गरिएको इलाका प्रहरी कार्यालयका प्रहरी नायब उपरीक्षक रेवतीरमण पोखरेलले जानकारी दिए।यसअघि चैत ३ गते सोही स्थानमा सिन्धुलीबाट बर्दिबासतर्फ आइरहेको बा३ख ५८३२ नम्बरको ट्रक जाँच गर्दा ५४७ किलोग्राम गाँजा बरामद गरिएको थियो।

सोही क्रममा चालक सिन्धुपाल्चोकको बाह्रबिसे–७ का ३७ वर्षीय सलिन मगरलाई पक्राउ गरी कानुनी कारबाही अघि बढाइएको छ।चैत ८ गते ढल्केबर-जनकपुर सडकखण्डको लक्ष्मीनिया चोकमा मधेस प्रदेश–०३–००२–ख २५२० नम्बरको ट्रक जाँच गर्दा पाँच क्विन्टल १० किलो गाँजा बरामद गरिएको थियो। ट्रक चालक मकवानपुरको थाहा नगरपालिका–२ का २५ वर्षीय सञ्जीव सिन्तानलाई नियन्त्रणमा लिई आवश्यक कारबाही प्रक्रिया अघि बढाइएको प्रहरीले जनाएको छ।

पहाडी जिल्लाबाट ठूलो मात्रामा गाँजाको ओसारपसार हुँदै आएको छ। बर्दिबासलाई लागुऔषध तस्करीका लागि ‘ट्रान्जिट प्वाइन्ट’ बनाइएको प्रहरी अनुसन्धानले देखाएको छ। हरेक वर्ष बर्दिबास क्षेत्रमा ठूलो परिमाणमा गाँजा बरामद गरिन्छ।

यद्यपि, भरिया र ट्रक चालक पक्राउ परे पनि मुख्य कारोबारी प्रहरीको पहुँचभन्दा बाहिरै रहेका छन्। प्रहरी स्रोतका अनुसार तस्करहरू नयाँ-नयाँ तरिका अपनाएर गाँजा ओसारपसार गर्ने प्रयास गरिरहेका छन्। लागुऔषध नियन्त्रण ब्यूरोले थप अनुसन्धान अघि बढाएको छ।