काठमाडौं ।

राष्ट्रिय स्वतन्त्र पार्टी (रास्वपा) का सभापति रवि लामिछानेले सभामुख देवराज घिमिरेलाई भेटेर आफ्नो सांसद पद निलम्बन फुकुवा गर्न आग्रह गरेका छन्। उनले मंगलबार बिहान सभामुखसँग व्यक्तिगत भेटघाट गरेर पुनः यही माग गरेका हुन्।

यसअघि पनि लामिछानेले गत माघ १८ गते सभामुखलाई भेटेर आफ्नो सांसद पद निलम्बन फुकुवा गर्न अनुरोध गरेका थिए।

रवि लामिछानेलाई सांसद पदबाट गत पुस ८ गते निलम्बन गरिएको थियो। उनी गत कात्तिक २ गते सहकारी ठगी, संगठित अपराध र सम्पत्ति शुद्धीकरणका आरोपमा पक्राउ परेका थिए। कास्की जिल्ला अदालतमा लामिछानेविरुद्ध अभियोगपत्र दर्ता भएपछि कास्की जिल्ला प्रहरीले संघीय संसद सचिवालयलाई जानकारी पत्र पठाएको थियो। सोही पत्रका आधारमा लामिछानेको सांसद पद निलम्बनमा परेको हो।

रास्वपा पार्टीले लामिछानेको सांसद पद निलम्बनमा सभामुखले विवेक नपुर्‍याएको टिप्पणी गरेको छ। पार्टीका नेताहरूले लामिछानेको सांसद पद निलम्बनको कारणमा असहमतिपनि जनाएका छन्, र कास्की जिल्ला प्रहरी कार्यालयको पत्रले मात्र उक्त निलम्बनको आधार नपर्ने दाबी गरेका छन्।

संसद सचिवालयले भने लामिछानेको सांसद पद निलम्बनको आधारमा कास्की जिल्ला प्रहरी कार्यालयको पत्रलाई देखाउँदै आएको छ।