काठमाडौँ ।

प्रतिनिधि सभाको कार्यसूचीबाट गृहमन्त्री रमेश लेखकको सम्बोधन हटाइएको छ ।

मंगलवारको बैठकमा गृहमन्त्री लेखकले सांसदहरूले उठाएका प्रश्नको जवाफ दिने कार्यसूची तय गरिएको थियो । तर राष्ट्रिय प्रजातन्त्र पार्टीका सांसद दीपक बोहराको निधन भएपछि उक्त कार्यक्रम कार्यसूचीबाट हटाइएको हो । सांसद बोहराको मंगलवार उपचारका क्रममा निधन भएको थियो ।

सभामुख देवराज घिमिरेले बैठक सुरु गर्दै भने, “माननीय सदस्यहरू, विशेष कारणवश आजको क्रमसङ्ख्या १ देखि ८ सम्मका कार्यक्रमहरू सूचीबाट हटाइएको जानकारी गराउँछु । साथै, माननीय गृहमन्त्रीले बोल्नका लागि माग गर्नुभएको समय समेत हटाइएको छ।”

यसैबीच, संसदको चालु अधिवेशन मंगलवार राति १२ बजेबाट अन्त्य हुने भएको छ । सभामुख घिमिरेले संसदमा जानकारी गराउँदै भने, “चालु अधिवेशन आज राति १२ बजेबाट अन्त्य हुनेछ।”

बैठकमा सांसद बोहराको निधनप्रति शोक प्रस्ताव पारित गरिएको थियो । शोक प्रस्ताव पारित गर्दै बैठक स्थगित गरिएको छ ।